عێراق بۆ دابینکردنی مووچە زیاتر لە 30 ملیار دۆلاری یەدەگی نەختینەیی بەکارهێناوە

SNN-

پارێزگاری بانکی ناوەندیی عێراق رایگەیاند، بەهۆی داخستنی گەرووی هورمز و لێکەوتە ئابوورییەکانی جەنگی ئەمریکا و ئیسرائیلەوە، یەدەگی نەختینەیی عێراق بە بڕی نزیکەی 30 ملیار دۆلار کەمیکردووە و زۆربەی پارەکەش بۆ پێدانی مووچەی فەرمانبەران خەرجکراوە.

نزار ناسر، پارێزگاری بانکی ناوەندیی عێراق لە میانی کۆبوونەوەیەکدا لەگەڵ لیژنەی دارایی پەرلەمان ئاماژەی بەوەکرد، یەدەگی نەختینەیی وڵات لە 109 ملیار دۆلارەوە بۆ نزیکەی 77.5 ملیار دۆلار دابەزیوە و قەبارەی زیانەکە 31.5 ملیار دۆلار بووە.

ڕوونیشیکردەوە، زۆربەی ئەو یەدەگەی خەرجکراوە، ئاڕاستەی پێدانی مووچەی فەرمانبەران کراوە، “کاردەکەین بۆ پاراستنی سەقامگیریی ئابووری و بەڕێوەبردنی پارە بەشێوەیەکی دروست.”