ئێران: ئەمریکا جەنگی هەڵگیرساندووە و دەیەوێت جیهان تێچووەکەی بدات
SNN-
ئێران بە توندی وڵاتی ئەمریکا بە تێکدانی هاتووچۆی بازرگانی و دروستکردنی قەیرانی دەریایی لە گەرووی هورمزدا تۆمەتبار دەکات و ڕایدەگەیەنێت، واشنتن هەوڵ دەدات سەرنجەکان لەو جەنگە لابدات کە خۆی هەڵیگیرساندووە و تێچووەکەی بەسەر تەواوی جیهاندا ساخ بکاتەوە.
ئیسماعیل بەقائی، وتەبێژی وەزارەتی دەرەوەی ئێران، لە پۆستێکدا لە تۆڕی کۆمەڵایەتیی ئێکس جەختی کردەوە کە گەرووی هورمز تاوەکو پێش دەستپێکردنی هێرشەکانی ئەمریکا و ئیسرائیل لە 28ـی شوباتدا، بە تەواوی کراوە و لە دۆخێکی ئاساییدا بووە، بەڵام دەستپێکردنی ئۆپەراسیۆنە سەربازییەکان بووە هۆی تێکدانی رەوتی سرووشتیی کەشتییە بازرگانییەکان، وەستانی تانکەرەکانی نەوت و بەرزبوونەوەی بەرچاوی نرخی وزە لە بازاڕە جیهانییەکاندا.
وتەبێژی وەزارەتی دەرەوەی ئێران ئاماژەی بەوەشکرد کە واشنتن دەیەوێت لێکەوتەکانی ئەو پشێوییەی کە بەهۆی سیاستە سەربازییەکانییەوە دروست بووە، بخاتە مل تارانەوە، لە کاتێکدا کۆماری ئیسلامی جەخت لەسەر ئەوە دەکاتەوە کە ئەمریکا خۆی دەستپێشخەر بووە لە هەڵگیرسانی ئەم بارودۆخە ئاڵۆزەدا.
لە بەرامبەر ئەم لێدوانانەدا، ئیدارەی ئەمریکا بە سەرۆکایەتیی دۆناڵد ترەمپ ڕوانگەیەکی جیاواز پیشان دەدات و ڕایگەیاندووە کە قەبارەی هەناردە و تێپەڕبوونی نەوت بە گەرووی هورمزدا گەڕاوەتەوە ئاستی پێشووی خۆی و گەیشتووەتە نزیکەی 18 ملیۆن بەرمیل لە ڕۆژێکدا.
واشنتن لەم چوارچێوەیەدا سورە لەسەر پاراستنی ئاسایشی ڕێڕەوە دەریاییەکان و تاران بە دروستکردنی هەڕەشە بۆ سەر کەشتییە بازرگانییەکان تۆمەتبار دەکات، بە جۆرێک کە هەردوولا یەکتر بە هۆکاری سەرەکیی تێکچوونی سەقامگیریی ئەم ناوچە ستراتیژییەی جیهان دەزانن.
