دەست بە دابەشکردنی قەرزی فەرمانبەران دەکرێتەوە و بڕیاری نوێ بۆ کەرتی تایبەت درا

SNN-

 وەزیری دارایی عێراق لە سەردانێکی مەیدانیدا بۆ بانکی ڕافیدەین، چەند بڕیارێکی گرنگی دەرکرد و فەرمانی کرد بە دەستپێکردنەوەی پێدانی قەرز بە فەرمانبەران، ئاسانکاریکردنی ڕێکارەکان و تەمویلکردنی پڕۆژەکانی کەرتی تایبەت.

بەپێی ڕاگەیەندراوێکی وەزارەتی دارایی، فالح ساری، وەزیری دارایی عێراق، سەرپەرشتی کۆبوونەوەیەکی کرد لەگەڵ عەلی کەریم، بەڕێوەبەری گشتی بانکی ڕافیدەین و ژمارەیەک لە بەرپرسانی بانکەکە، تێیدا لە نزیکەوە ئاگاداری بەڕێوەچوونی کارەکان و ئاستی خزمەتگوزارییەکان بوو.

بڕیارەکان و ئاسانکاری بۆ فەرمانبەران

 وەزیری دارایی ئاراستەی ئیدارەی بانکی ڕافیدەینی کرد بە دەستپێکردنەوە و خستنەگەڕی قەرزە داراییەکان بۆ فەرمانبەران، هاوکات جەختی کردەوە لەسەر ئاسانکاریکردنی ڕێکارەکانی وەرگرتنی قەرز، کەمکردنەوەی کاتی پێویست بۆ ئەنجامدانی مامەڵەکان و سادەکردنەوەی هەنگاوەکانی پێشکەشکردنی داواکاری.

پشتیوانیکردنی کەرتی تایبەت و بازرگانان

 سەرەڕای قەرزی فەرمانبەران، وەزیری دارایی ڕێنمایی دا بە دابینکردنی تەواوی ئاسانکارییە بانکییەکان بۆ کەرتی تایبەت و بەهێزکردنی کۆمپانیاکان بۆ دەستگەیشتن بە تەمویلی پێویست، بە ئامانجی پشتیوانیکردنی چالاکییە بەرهەمهێنەر و وەبەرهێنانەکان و ڕەخساندنی دەرفەتی کار و جووڵاندنی ئابووری.

لە چوارچێوەی سەردانەکەشدا، وەزیری دارایی لقی نوێی تایبەت بە پیاوانی کار و بازرگانانی لە ناو بینای سەرەکیی بانکەکەدا کردەوە، بۆ ئەوەی خزمەتگوزاریی بانکیی تایبەتمەند و خێراتریان پێشکەش بکرێت.

چاکسازی لە سیستمی بانکیدا

 فالح ساری جەختی کردەوە کە بانکی ڕافیدەین بڕبڕەی پشتی سیستمی بانکیی حکومییە لە پشتگیریکردنی ئابووری و پێشکەشکردنی خزمەتگوزاریی بانکی، بۆیە بەردەوامبوون لە گەشەپێدانی ژێرخانی تەکنەلۆژی و ئیداریی بانکەکە پێویستییەکی حەتمییە. ئەوەشی ڕوونکردەوە کە ئەم هەنگاوانە لە چوارچێوەی چاکسازیی دارایی و ئیداریی وەزارەتدا دێن بۆ فراوانکردنی بەکارهێنانی سیستمی دیجیتاڵی.