له سبه‌ینێوە هێزه ئه‌منیه‌كان دێنه ناوشار و هاووڵاتیان ناچار به‌تاك پارێزى ده‌كه‌ن
وێنە-SNN
SNN-هه‌وراز ئه‌حمه‌د
جێگرى به‌ڕێوەبه‌رى ته‌ندروستى سلێمانى رایده‌گه‌نێت :”له‌گه‌ڵ قه‌ده‌غه‌ى هاتووچۆنین چونكه بارودۆخى ئابوورى هاووڵاتیان زۆر خراپه بۆیه تاكپارێزى له‌م قۆناغه‌دا تاكه چاره‌سه‌ره بۆ خۆپارێزى له ڤایرۆسه‌كه”.
عه‌بدوڵا ئه‌حمه‌د، جێگرى به‌ڕێوبه‌رى ته‌ندروستى سلێمانى به snnى ڕاگه‌یاند :”له ته‌ندروستى سلێمانى داوامان له هێزه ئه‌منیه‌كان كردوه له سبه‌ى چوارشه‌ممه وه دابه‌زنه ناو شار و بازاڕ بۆ ئه‌وه‌ى فرۆشیار و دوكاندار و هاووڵاتیان ناچاربكه‌ن كه خود پارێزى و تاك پارێزى جێبه‌جێ بكه‌ن بۆ ئه‌وه بتوانین ڕێگرى بكه‌ین له زیاتر بڵاو بونه‌وه‌ى ڤایرۆسى كۆرۆنا”.
وتیشى”جێگاى داخه ئاماره‌كان له هه‌ڵكشاندایه و له‌م قۆناغه‌شدا به هۆى خراپى بارى ئابوورى هاووڵاتیانه‌وه ناتوانین بڕیارى قه‌ده‌غه‌ى هاتووچۆ و كه‌ره‌نتینه بده‌ین بۆیه تاكه چاره‌سه‌ر ئه‌وه‌یه كه هاووڵاتیان خۆیان بپارێزن و دوربكه‌ونەوە له شوێنى قه‌ره‌باڵه‌غ و زۆر تێكه‌ڵاوى دروست نه‌كه‌ن”.
هاوكات ڕوونى كرده‌وه”ئه‌وه‌ى ده‌بینین هاووڵاتیان به‌شێوه‌یه‌كى باش پابه‌نى رێنمایه ته‌ندروستیه‌كانن به‌ڵام پێویسته زیاتر پابه‌ند بن تاوه‌كو بتوانین كۆنترۆڵى ڤایرۆسى كۆرۆنا بكه‌ین له سنوره‌كه‌دا”.
