دوای حەوت رۆژ تەرمی گەنجێک لە بەنداوی خاسە دەرهێندرا
SNN-عیماد جەباری
نیوەڕۆی ئەمڕۆ پێنجشەممە 11ی حوزەیران لە دوای حەوت رۆژ گەڕان، تەرمی گەنجێکی کەرکوک بە خنکاوی لە بەنداوی خاسە دەرهێنرا.
زانا نەبەز ئامۆزای گەنجە خنکاوەکە بە SNNی راگەیاند: کەمێک بەر لەئێستا تەرمەکەی ئەحمەد حەمید لەلایەن تیمەکانی پۆلیسی دەریاوانی کەرکوکەوە بەهەماهەنگی لەگەڵ تیمی غەواسی گۆبتەپە لە بەنداوی خاسە دەرهێنرا.
وتیشی، لەدوای خنکانیەوە ماوەی حەوت رۆژە هەوڵێکی زۆر درا بۆ دەرهێنانی تەرمەکەی، تیمی غەواسی تەقتەق و دەربەندیخان و بەغدا هەوڵێکی زۆریاندا بەڵام بێ ئەنجامبوو.
ئەحمەد حەمید تەمەن 22 ساڵ گەنجێکی دانیشتوی گەڕەکی پەنچاعەلی کەرکوکە، رۆژی 4ی حوزەیران لەگەڵ چەند هاوڕێیەکی چووەتە بەنداوی خاسە بۆ راوە ماسی، بەڵام لە بەنداویت خاسەدا خنکا.
