ئەو کەسەی رووداوی خنکاندنی جۆرج فلۆید-ی تۆمار کرد کچێکی 17 ساڵانە

SNN-

ئەو کەسەی ساتی خنکاندنی هاووڵاتییە ئەمریکییە بەڕەگەز ئەفریقییەکەی لەلایەن پۆلیسێکەوە تۆمار کرد، کچێکی 17 ساڵانە و دەڵێت: “لەترسا نەمتوانی هیچ رێگرییەک بکەم لەڕووداوەکە”.

دارنێلا فرایزەر ئەو کچە تەمەن 17 ساڵەیە کە لەساتی رووداوەکەدا بۆ کڕینی پێداویستی رۆژانەی چۆتە سۆپەرمارکێتێک.

ئەو گرتە ڤیدیۆییەی کچە رەشپێستەکە بووە بەڵگەیەکی حاشا هەڵنەگر بۆ دادگاکانی ئەمریکا تا بکەرەکانی پێ سزا بدەن.

فرایزەر لەڕۆژێک دوای رووداوەکە واتە لە 26ی ئایار ڤیدیۆکەی بڵاوکردەوە کە لەلایەن هەندێک لەخەڵکەوە رووبەڕووی رەخنە بۆوە بەوەی لەجیاتی هاوکاریی بکردایە قوربانییەکە رزگار بکات، وێنەی گرتووە.

لەوەڵامی ئەو رەخنانەدا فرایزەر دەڵێت: “من تەمەنم خوار 18 ساڵە و نەمتوانیوە وەک پێویست هاوکاری بکەم و ترساوم”.

وێنەی فرایزەر کاتێک ئاشکرا بوو کە دوێنێ چووە شوێنی رووداوەکە و بەکوڵ گریا بۆ لەدەستدانی فلۆید.

رۆژی 25ی ئایاری رابردوو لەشاری مینیاپۆلس، چوار پۆلیس پیاوێکی رەشپێستی تەمەن 46 ساڵ بە ناوی جۆرج فلۆید بە تۆمەتی ساختەکاری رادەگرن و کەلەپچەی دەکەن.

پیاوە رەشپێستەکە لە نێو ئۆتۆمبێلەکەی بووە و پۆلیس دەیهێنێتە خوارەوە، دواتر یەکێک لە پۆلیسەکان پیاوە رەشپێستەکە دەخاتە سەر زەوی و قاچێکی دەخاتە سەر ملی، هەرچەند پیاوە رەشپێستەکە دەڵێت ناتوانم هەناسە بدەم، پۆلیسەکە وازی لێناهێنێت، تاوەکو دەبوورێتەوە و دواتریش لە نەخۆشخانە گیانلەدەستدەدات.