پارێزگاری سلێمانی: پێویست بکات قەدەغەی هاتووچۆ رادەگەیەنین

SNN

پارێزگاری سلێمانی رایگەیاند: “ئه‌گه‌ر ئاستی پارێزبه‌ندی و خۆپارێزی خه‌ڵك دابه‌زی و هاوڵاتیان پابه‌ند نه‌بوون، ئه‌وا‌ به‌دڵنیاییه‌وه‌ ناچار ده‌بین قه‌ده‌غه‌ی ته‌واوی هاتوچۆ رابگه‌یه‌نینه‌وه‌”.

هه‌ڤاڵ ئه‌بوبه‌كر پارێزگاری سلێمانی بە دەنگی ئەمریکای وتووە: ئەگەر ژمارەی تووشبووان لە سلێمانی بەشێوەیەکی بەرچاو هەڵکشا ئەوا ناچاردەبین ئەو تووشبووانەی نیشانەی کەمیان هەیە لە ماڵەکانی خۆیاندا بیانهێڵینەوە و کەرەنتینیان بکەین، ماڵه‌كان ببێت به‌ نه‌خۆشخانه‌ وه‌كو ئه‌و دیارده‌یه‌ی كه‌ لە هه‌موو وڵاتانی تردا جێبەجێ دەکرێت.

راشیگەیاند: “ئێمه‌ پێمان وایه‌ ئه‌گه‌ر له‌سه‌ر ئه‌و ئاستی خۆپارێزیه‌‌ی ئێستا به‌رده‌وام بین وه له‌سه‌ر ئه‌و شێواز و ڕێكارانه‌ و چاودێریكردنی دۆخه‌ی ئێستا‌ به‌رده‌وام بین، له‌ هه‌فته‌كانی داهاتوودا بارودۆخه‌كان به‌ره‌و باشی ده‌چن، به‌ پێچه‌وانه‌شه‌وه‌ ئه‌گه‌ر له‌سه‌ر خۆپارێزی به‌رده‌وامنه‌بین و ئه‌گه‌ر ڕێكاره‌كان شل بێته‌وه‌، ئه‌وا بارودۆخه‌كان به‌ره‌و سه‌ختی ده‌ڕۆن”.

وتیشی: رۆژانە هاووڵاتیان زیاتر پابەندی رێنماییە تەندروستییەکان دەبن، داواش لە خاوەن کارەکان دەکەین پابەندی رێنماییەکان بن و رێگە بە هیچ کەسێک نەدەن بە بێ خۆپارێزی سەردانی بازاڕ و دوکانەکان بکات.

ئەوەشی وت: ئه‌و ژمارانه‌ی كه‌ له‌ سلێمانی ده‌بینرێت به‌رزبوونه‌ته‌وه‌، به‌ڵگه‌ نییه‌ بۆ بڵاوبوونه‌وه‌ی به‌رفراوانی په‌تاكه‌ به‌ڵكو ئاماژه‌یه‌ بۆ ئه‌وه‌ی كه‌ رۆژانه‌ ژماره‌یه‌كی زۆر پشکنین بۆ خەڵک دەکرێت.