پارێزگار و بەڕێوەبەری تەندروستی سلێمانی داوای دابەشکردنی مووچە دەکەن

SNN

هەڤاڵ ئەبوبەکر، پارێزگاری سلێمانی لەگەڵ سەباح هەورامی، بەڕێوەبەری گشتی تەندروستی سلێمانی کۆبوەوە و لە راگەیەندراوێکدا داوای بەپەلە دابەشکردنی موچەی کەرتی تەندروستی و فەرمانبەرانیان کرد.

پارێزگای سلێمانی، ئه‌مڕۆ سێشه‌ممه‌، لە راگەیەندراوێکیدا ئەوەی خستووەتەڕوو: “هه‌ڤاڵ ئه‌بوبه‌كر پارێزگاری سلێمانی، له‌ دیوانی پارێزگادا له‌گه‌ڵ سه‌باح هه‌ورامی به‌ڕێوه‌به‌ری گشتی ته‌ندروستی سلێمانیدا كۆبونەتە‌وه‌ بۆ گفتوگۆکردن لەسەر رێکارەکانی بەرەنگاربوونەوەی کۆرۆنا”.

هەردوولا داوایان لە حکومەتی هەرێم کرد هەرچی زووە موچە و شایستە داراییەکانی کەرتی تەندروستی و کەرتەکانی تریش دابەش بکات.

ئاماژەش بەوەکراوە: “پارێزگاری سلێمانی و بەڕێوەبەری گشتی تەندروستی سلێمانیش هەموولایەک دڵنیا دەکەنەوە، کە دڵسۆزانە و خۆنەویستانە بە یەکەم تیم و یەک پەیام و یەک ئیرادە کاری بەردەوام دەکەن بۆ پاراستنی تەندروستی گشتیی”.

دواکەوتنی وادەی دابەشکردنی مووچە ناڕەزایی پزیشکان و کارمەندانی تەندروستی و مووچەخۆرانی دیکەشی لێکەوتووەتەوە، بەوهۆیەوە دوێنێ لقی سلێمانیی سەندیکای پزیشکانی کوردستان مانگرتنی گشتییان راگەیاند و نەخۆشخانەی شار و شەهید ئاسۆش کارکردن تیایدا راگیرا.