دەوام لە فەرمانگەی چاکسازی گەورانی سلێمانی راگیرا

SNN

دوای ئەوەی دوو کارمەندی مەدەنی لە فەرمانگەی چاکسازی گەورانی سلێمانی تووشی ڤایرۆسی کۆرۆنا بوون، دەوام لە فەرمانگەکە راگیرا.

بە گوێرەی راگەیاندنی چاکسازی گەورانی سلێمانی، لەدوای تووشبوونی ئەو دوو کارمەندە بە ڤایرۆسی کۆرۆنا بڕیاردراوە لە سبەینێوە 17ی حوزەیران، تا 28ی حوزەیران دەوامی کارمەندانی مەدەنی فەرمانگەکە رابگیرێت.

ئەوەش خراوەتەڕوو: راگرتنی دەوام لەپێناو پاراستنی گیانی کارمەندان و سزادراوانی چاکسازی گەورەیە.

ئەمە لەکاتێکدایە، بەهۆی مەترسی بڵاوبوونەوەی کۆرۆنا لەناو زیندانەکاندا، وەزارەتی کار و کاروباری کۆمەڵایەتی سەردانیکردنی زیندانیکراوانی راگرتووە.

فەرمانگەی چاکسازی گەوران یەکەم دەزگای حکومی نیە کە بەهۆی بڵاوبوونەوەی کۆرۆنا بۆ ماوەیەکی کاتی دەوامی راگرتبێت، پێشتر بەڕێوەبەرایەتییەکانی کشتوکاڵ و شەهیدان و ئەنفالکراوان لە سلێمانی بۆ چەند هەفتەیەک دەوامیان راگرت.