لەبارەی هەوڵی سوتاندنی چوار منداڵ لەلایەن باوكیانەوە پۆلیس روونكردنەوە دەدات

SNN-عەلی حەمە سەعید

نیوەڕۆی ئەمڕۆ پیاوێکی دانیشتووی شاری هەڵەبجە لەبەردەم سەرۆكایەتی شارەوانی هەڵەبجەدا بە نیازبوو خۆیی و چوار منداڵی ئاگر تێبەربدات، بەهۆی ئەوەی گوایە لەلایەن شارەوانییەوە ڕێگری لێدەكرێت سەوزە بفرۆشێت، پۆلیسیش روونکردنەوە دەدات.

رائید بەرزان عوسمان، وتەبێژی پۆلیسی پارێزگای هەڵەبجە بە SNNی راگەیاند: دوای ئەوەی هاووڵاتییەكی شاری هەڵەبجە كە تەمەنی 48 ساڵە و دانیشتووی گەڕەكی شارەوانییە داوای شوێنێك دەكات لە ناو بازاڕی هەڵەبجە پێی بدرێت بۆ كاركردن بەڵام داواكە لەلایەن شارەوانی هەڵەبجەوە ڕەتدەكرێتەوە، چونكە ئەو شوێنەی ئەو هاووڵاتییە داوای كردووە زیادەڕۆیە و تا ئێستا دوو كەسی دیكە لەسەر ئەو شوێنە دراون بەدادگا و دۆسیەیان بۆكراوەتەوە.

ئاماژەی بەوەشكرد، ئەمڕۆ ئەو هاوڵاتییە كە چوار منداڵی هەیە لەماڵەوە دەیانهێنێت و بە بێ‌ ئاگاداری ئەوان لەبەردەم بینای سەرۆكایەتی شارەوانی نەوت دەكات بەخۆیی و منداڵەكانیدا، داوای ئەوەی هەیە كە ئەگەر ئەو شوێنەی پێنەدرێت ئاگر لە خۆیی و منداڵەكانی بەردەدات.

وتەبێژەكەی پۆلیسی پارێزگای هەڵەبجە ئەوەشی خستەڕوو، لەلایەن هاووڵاتیان و مەفرەزەی پۆلیسی شارەوانی و یاریدەدرێتی ئاسایشی هەڵەبجەوە ڕێگری لەوكارە دەكرێت و دواتر هاووڵاتییەكە و منداڵەكان دەبرێنە بنكەی پۆلیس، پاشان ڕەوانەی ماڵەوە كرانەوە وكۆتایی بە كێشەكەیان دەهێندرێت.