سەباح هەورامی: بەهۆی خراپی رەوشی داراییەوە قەدەغەی هاتووچۆ رانەگەیەندرا

سەباح هەورامی بەڕێوەبەری تەندروستی سلێمانی رایگەیاند: بڕیاردراوە ئەو شوێنانەی ناپێویستن دابخرێن بەڵام بەهۆی خراپی رەوشی ئابوورییەوە نەتوانرا قەدەغەی هاتووچۆ رابگەیەنرێت.

د. سەباح هەورامی ئەمڕۆ لەدوای کۆبوونەوەی لەگەڵ ژووری ئۆپراسیۆنەکانی سلێمانی بە میدیاکانی راگەیاند: “بڕیاردراوە مزگەوتەکان و یانەکانی شەوانە و کافتریا و شوێنی کێشانی نێرگەلە و چایخانەکان دادەخرێن، هەروەها پاس و مینی پاسەکانیش قەدەغە دەکرێن و هاووڵاتیان دەبێت بە پێ یان تەکسی هاتووچۆ بکەن”.

ئاماژەشی بەوەکرد: “بازاڕ و مۆڵە گشتییەکان رێکاری تەندروستی توندیان بۆ دیاری دەکرێت و هەر کەسێک پێیانەوە پابەند نەبێت رێکاری یاسایی دژیان دەگرینەبەر”.

لەبارەی رەوشی پارێزگای سلێمانییەوە وتی: “پێشبینی دەکرێت ژمارەی تووشبووانی راستەقینەی کۆرۆنا دوو هێندە و سێ هێندە لەو ژمارەیەی کە هەیە زیاتربێت، لە ئێستادا پێنج هەزار کەس چاوەڕوانن پشکنینیان بۆ بکرێت کە پێدەچێت نیوەیان تووشبوو بن”.

وتیشی: “زۆرینەی ئەو تووشبووانەی کۆرۆنا کە داخڵی نەخۆشخانەکان دەکرێن تەندروستییان ناجێگیرە و ئەوانەی تەندروستییان باشە لە ماڵەکانی خۆیاندا کەرەنتین دەکرێن”.

راشیگەیاند: “ئەگەرچی هەروەکو پێشتر داوای قەدەغەی هاتووچۆمان کرد بەڵام بەهۆی دابەش نەکردنی مووچە و بارودۆخی ئابووری و سیاسییەوە نەتوانرا ئەو پێشنیازە پەسەند بکرێن”.

سەبارەت بە گرتنەبەری رێکاری تەندروستی لە مەرزەکان، سەباح هەورامی وتی: “دۆخەکە گەیشتۆتە ئاستێک کە دەبێت مەرزەکان خۆیان لە خەڵکی هەرێم بپارێزن نەک بە پێچەوانەوە”.

ئەمڕۆ لیژنەی باڵای ئۆپراسیۆنەکانی پارێزگای سلێمانی چەند بڕیارێکی پەیوەست بە ژیانی هاووڵاتیان دەرکرد.