ئەو هاووڵاتیانەی هەرێم ئاگاداردەکرێنەوە کە لە ئێران گیریان خواردووە
SNN
دەروازەی نێودەوڵەتی حاجی ئۆمەران رایگەیاند، ھەموو ئەو ھاوڵاتیانەی هەرێم کە لە ئێران گیریانخواردووە و بۆ گەڕانەوەیان رەزامەندی وەزارەتی ناوخۆیان ھەیە، دەتوانن لە دوو رۆژی هەفتەدا لە سنوری حاجی ئۆمەرانەوە بگەڕێنەوە.
دەروازەی نێودەوڵەتی حاجی ئۆمەران ئەمڕۆ لە راگەیەندراوێکدا ئەوەشی خستووەتەڕوو: “ھەموو ئەو ھاوڵاتیانەی کە لە ئێران ماونەتەوە و بۆ گەڕانەوەیان رەزامەندی وەزارەتی ناوخۆیان ھەیە و ئەو ھاوڵاتیانەی بیانی کە رەزامەندی وەزارەتی ناوخۆیان ھەیە بۆ داخڵ بوونی ھەرێمی کوردستان هەفتانە لە رۆژانی دووشەممە و پێنجشەممەدا دەتوانن بگەڕێنەوە”.
ئاماژەی بەوەشکرد، تەنیا دەتوانن لە رۆژانی دووشەممە و پێنجشەممە لە رێگای سنوری حاجی ئۆمەرانەوە بگەڕێنەوە بۆ ھەرێمی کوردستان لەگەڵ جێبەجێکردن و پابەندبوون بە گشت رێنمایی و رێکارەکانی وەزارەتی تەندروستی.
بڵاوبوونەوەی ڤایرۆسی کۆرۆنا و داخستنی سنوورەکان گرفتی بۆ ئەو هاووڵاتیانەی هەرێم دروستکردبوو کە لە وڵاتێکی دیکەدا گیریانخواردبوو.
