نێچیرڤان بارزانی لەگەڵ بەرپرسانی باڵای بەغدا کۆدەبێتەوە
SNN
نێچیرڤان بارزانی، سەرۆکی هەرێمی کوردستان لەگەڵ هەردوو جێگرەکەی گەیشتنە بەغدا و لەگەڵ بەرپرسانی باڵای عێراق لە حکومەت و لایەنە سیاسییەکان، لەبارەی کێشە هەڵپەسێردراوەکانی نێوان هەرێم و بەغدا کۆدەبنەوە.
بە گوێرەی میدیای نزیک لە حزبەکەی، نێچیرڤان بارزانی، بۆ دانوستاندن و چارەسەرکردنی کێشەکانی هەرێم و بەغدا، بەتایبەتی پرسی بودجە و مووچە و شایستە داراییەکانی هەرێمی کوردستان سەردانی بەغدای کردووە.
لەو سەردانەدا سەرۆکی هەرێمی کوردستان، لەگەڵ مستەفا کازمی سەرۆکوەزیران و بەرهەم ساڵح، سەرۆککۆماری عێراق، محەممەد حەلبووسی، سەرۆکی ئەنجوومەنی نوێنەرانی عێراق بەجیا کۆدەبێتەوە.
لەسەر ئاستی حیزبەکانیش لەگەڵ هادی عامری سەرۆکی هاوپەیمانیی فەتح، نووری مالیکی، سەرۆکی هاوپەیمانیی دەوڵەتی یاسا، عەممار حەکیم سەرۆکی رەوتی حیکمە و سەدرییەکان کۆدەبێتەوە.
لە سەردانەکەیدا، مستەفا سەید قادر و جەعفەر شێخ مستەفا هەردوو جێگری سەرۆک لەگەڵیدا دەبن.
ئەمە لەکاتێکدایە، ئەو 30 رۆژەی وەزیری دارایی عێراق بۆ حکومەتی هەرێم دیاری کردبوو تا دارایی هەرێم و داهاتی نەوتی و نانەوتی هەرێمی کوردستان رێکبخات تەواوبووە.
