راگەیەنراوی کۆبوونەوەی مستەفا کازمی و نێچیرڤان بارزانی

کازمی جەختیکردۆتەوە کە پێکەوە دەبێت ئاستەنگەکان و ئاڵنگارییەکانی ئێستا تێبپەڕێنن بە تایبەت قەیرانی ئابووری دوای دابەزینی نرخی نەوت کە هۆکارەکەی هاتنی ڤایرۆسی کۆرۆنا بووە.

لە راگەیەنراوەکەی نوسینگەی رۆژنامەوانیی کازمیدا ئەوەش هاتووە “لە کۆبوونەوەکەدا باسی کێشەکانی نێوان حکومەتی فیدراڵی و حکومەتی هەرێمی کوردستان کراوە و جەخت لە چارەسەری کێشەکان لەسەر بنەمای دەستوور کراوەتەوە”.
ئەمڕۆ شەممە 20ی حوزەیران نێچیرڤان بارزانی، سەرۆکی هەرێمی کوردستان لەگەڵ هەردوو جێگرەکەی گەیشتنە بەغدا و لەگەڵ بەرپرسانی باڵای عێراق لە حکومەت و لایەنە سیاسییەکان، لەبارەی کێشە هەڵپەسێردراوەکانی نێوان هەرێم و بەغدا کۆدەبنەوە.
لەو سەردانەدا سەرۆکی هەرێمی کوردستان، لەگەڵ مستەفا کازمی سەرۆکوەزیران و بەرهەم ساڵح، سەرۆککۆماری عێراق، محەممەد حەلبووسی، سەرۆکی ئەنجوومەنی نوێنەرانی عێراق بەجیا کۆدەبێتەوە.

لەسەر ئاستی حیزبەکانیش لەگەڵ هادی عامری سەرۆکی هاوپەیمانیی فەتح، نووری مالیکی، سەرۆکی هاوپەیمانیی دەوڵەتی یاسا، عەممار حەکیم سەرۆکی رەوتی حیکمە و سەدرییەکان کۆدەبێتەوە.