کارمەندانی نەخۆشخانەی گشتی کەرکوک بایکۆتیان راگەیاند
SNN-عیماد جەباری
دژی بڕیاری تایبەتکردنی نەخۆشخانەی گشتی کەرکوک بە چارەسەری تووشبووانی کۆرۆنا، کارمەندانی تەندروستی ئەو نەخۆشخانەیە مانگرتنیان دەستپێکرد و دەڵێت: “هیچ کەلوپەلێکی خۆپاراستنمان نیە”.
دوای ئەوەی سەرۆکایەتی تەندروستی کەرکوک بە زۆرینەی دەنگ بڕیاریدا نەخۆشخانەی گشتی کەرکوک وەکو دووەم نەخۆشخانە لە شارەکەدا تایبەت بکرێت بە چارەسەرکردنی تووشبووانی کۆرۆنا، ئەمڕۆ پزیشکان و کارمەندانی تەندروستی نەخۆشخانەکە بایکۆتی دەوامیان کرد و شەقامی بەردەم نەخۆشخانەکەشیان داخست.
جەمیل عەباس یەکێک لە کارمەندە ناڕازییەکان بە SNN راگەیاند: ئێمە دژی ئەو بڕیارە دەوەستینەوە کە نەخۆشخانەکەی تایبەتکردوە بۆ توشبوانی کۆرۆنا لەکاتێکدا هیچ کەلوپەلێکی خۆپارێزی و تەنانەت مەوادی پاکژکەرەوەش لەنەخۆشخانەکەدا بونی نیە.
سەبارەت بە مەترسییە تەندروستییەکان، ئەو کارمەندە وتی: “لەچەند رۆژی رابردوودا چەند تووشبوویەک لەنێو هاوپیشەکانماندا تۆمارکران، داوامانکرد پشکنینمان بۆ ئەنجامبدرێت بەڵام تەندروستی داواکاریەکەمانی قبوڵ نەکرد و بەتەنها پشکنینی بۆ پزیشکەکان ئەنجامدا”.
بە وتەی ئەو کارمەندەی تەندروستی لەکاتێکدا ژمارەی تووشبووان رۆژ لە دوای رۆژ رووی لەزیادبونە و نزیکە نەخۆشخانەکان جێگایان نامێنێت، کەچی هێشتا ئیدارەی نەخۆشخانەکە ئامادەنیە جلی خۆپارێزی بەسەرماندا دابەشبکات.
لە ئێستا 451 تووشبوو لە نەخۆشخانەکان و بەشێکیشیان لەماڵەکانیاندا کەرەنتین کراون بۆ رێگری لەبڵاوبوونەوەی ڤایرۆسەکە، بەپێی دوایین ئاماریش 185 تووشبوو چاکبونەتەوە و ژمارەی گیان لەدەستدانیش گەیشتوەتە 25 توشبوو، کۆی گشتی تووشبووانیش تاوەکو ئێستا 661 حاڵەتە.
