یونسکۆ لۆگۆی شاری سلێمانی وەک شاری ئەدەبی پەسەندکرد

SNN

یونسکۆ لۆگۆی شاری سلێمانی وەک شاری ئەدەبیی یونسکۆ پەسەندکرد و لۆگۆی خۆی خستە سەر لۆگۆی فەرمیی شاری سلێمانی.

د. هەڤاڵ ئەبوبەکر پارێزگاری سلێمانی لە هەژماری خۆیەوە بڵاویکردەوە: لۆگۆکە لەلایەن هونەرمەند دیاری عوسمانەوە کێشراوە و وەک لۆگۆی فەرمیی شاری سلێمانی بۆ شارە داهێنەرە ئەدەبییەکانی جیهان لەلایەن یونسکۆوە مامەڵەی لەگەڵدا دەکرێت.

پارێزگاری سلێمانی ئاماژەی بەوەکردووە: ئەو لۆگۆیە لەسەر پێشنیازی خۆی وەک پارێزگاری سلێمانی و ئۆفیسی سلێمانی شاری ئەدەبیی یونسکۆ کراوە.

30ی تشرینی یەکەمی ساڵی رابردوو، رێکخراوی یونسکۆ لە ئاهەنگی رۆژی شارە جیهانییەکاندا، 66 شاری دیکەی جیهانی خستە لیستی شارە داهێنەرەکانی جیهانەوە و شاری سلێمانیش خرایە ناو لیستی 246 شاری داهێنەری یونسکۆوە.