ئەردۆغان: تورکیا لە شەڕی کۆرۆنادا شکستی هێناوە
ئەردۆغان، وینە: EPA
SNN
سەرۆککۆماری تورکیا رایگەیاند: تورکیا لە هەندێک رووەوە لە شەڕی دژ بە پەتای کۆرۆنا شکستی هێناوە، داواشی لە هاووڵاتیانی تورکیا کرد گرنگی زیاتر بە خۆپارێزی بدەن.
رەجەب تەییب ئەردۆغان لە چاوپێکەوتنێکی تەلەفزیۆنیدا لەگەڵ میدیای وڵاتەکەی، وتیشی: “ئامارەکانی چەند رۆژی رابردووی تووشبووان و گیانلەدەستدان بە کۆرۆنا لە تورکیا ئاماژەبوو بۆ ئەوەی لە بەرەنگاربوونەوەی پەتای کۆرۆنادا سەرکەوتوو نەبووین”.
ئەردۆغان باسی لە بڵاوبوونەوەی چەند وێنەیەک کرد کە تیایدا هاووڵاتیانی تورکیا دەرکەوتوون بە بێ پابەندبوون بە رێکارە تەندروستییەکان و دەمامک و دەستکێش، قەرەباڵغییان دروستکردووە و وتی: “ئەمە جێگەی شەرمەزارییە”.
ئەردۆغان سەرنجی لەسەر ئابووری وڵاتەکەشیەتی و رایگەیاندووە، پێویستە هاووڵاتیان هاوکاربن لە بوژاندنەوەی ئابووری تورکیا لە نیوەی دووەمی ئەمساڵدا.
هەر لەوبارەیەوە ئاژانسی هەواڵی رۆیتەرز لێدوانی لە چەند بەرپرسێکی حکومی و تەندروستی تورکیا وەرگرتووە کە ئەوانیش باسیان لەوەکردووە، رێگە نادرێت بەهۆی پەتای کۆرۆناوە ئابووری تورکیا لاوازبێت.
تا ئێستا زیاتر لە 185 هەزار کەس لە تورکیا تووشی کۆرۆنا بوون و هەزار و 200 کەسیش بەوهۆیەوە گیانیان لەدەستداوە.
