یەکێتی مامۆستایان: دەبێت بڕیاری کەمکردنەوەی مووچە تەنیا ئەم مانگەبێت

SNN

یەكێتی مامۆستایانی كوردستان رایگەیاند: “دەبێت بڕیاری کەمکردنەوەی مووچەی فەرمانبەرانی هەرێم کاتی بێت و تەنیا ئەم مانگە جێبەجێ بکرێت”.

عەبدولواحید محەمەد سەرۆکی یەكێتی مامۆستایانی کوردستان، ئەمڕۆ دووشەممە لە کۆنفرانسێکی رۆژنامەنووسیدا لە هەولێر رایگەیاند: “پێویستە بەشێوەیەکی دادپەروەرانە بڕیار لە کەمکردنەوەی مووچە بدرێت، بەشێوەیەک کەمترین کاریگەری لەسەر مووچەخۆرانی شایستە بە گشتی و مامۆستایانی سەر بە هەردوو وەزارەتی پەروەردە و خوێندنی باڵا هەبێت”.

وتیشی، پێویستە ئەم دواکەوتنە تاقەت پروکێنەی دابەشکردنی مووچە کۆتایی پێبهێنرێت و هەموو 30 رۆژ جارێک مووچە دابەشبکرێت هەروەک بەرپرسانی هەرێم پێشتر بەڵێنیان دابوو”.

سەرۆکی یەکێتی مامۆستایان هۆشداریشیدا لەوەی دواکەوتنی مووچە کاردانەوەی نەرێنی لەلایەن مامۆستایانەوە لێبکەوێتەوە و وتیشی: “ئەگەر تا ئێستا مامۆستایان کاردانەوەیان نەبووبێت بە رەچاوکردنی ئەم دۆخە بووە، لەبەر ئەوە هیوادارین بەڵێنەکانی حکومەت درێژە نەکێشێت”.

بڕیارە ئەمڕۆ هەرسێ سەرۆکایەتییەکەی هەرێم سەبارەت بە کەمکردنەوەی مووچە و دەرماڵەکان کۆببنەوە و بڕیار لەوبارەیەوە بدەن.