تەندروستى جیهانى: سلێمانى بووەتە چەقى بڵاوبوونەوەى ڤایرۆسى کۆرۆنا
SNN-هەوراز ئەحمەد
نوێنەری رێکخراوی تەندروستی جیهانی رایگەیاند: لە ئێستادا سلێمانی بووەتە چەقی بڵاوبوونەوەی ڤایرۆسی کۆرۆنا، پسپۆڕێکی تەندروستیش داوا دەکا “کۆرۆنا بە سیاسى نەکرێت”.
د.نەجمەدین حەسەن، نوێنەرى ڕێکخراوى تەندروستى جیهانى لە کۆنگرەیەکی رۆژنامەوانیدا ڕایگەیاند: “سلێمانى دووەم پارێزگایە لە سەر ئاستى عێراق بەم جۆرە کۆرۆناى تێدا بڵاو بووبێتەوە،کە ئەوە زەنگێکى مەترسیدارە چونکە تواناى تەندروستى سنوردارە و نەخۆشخانەکان جێگاى نەخۆشى تێدا نەماوە و تیمى تەندروستى پسپۆرمان زۆر کەمە و ئامێرى پزیشکیەکانیش وەک پێویست بەردەست نیە”.
وتیشى: “ئێستا سلێمانى لە ناوچەکەدا بووەتە چەقى بڵاوبوونەوەى ڤایرۆسى کۆرۆنا پێویستە هەموو لایەک دەست بە تاک پارێزى بکەن، چونکە تاوەکو ئێستاش لە جیهاندا پێکوتەیەک بەردەست نیە لە دژى ڤایرۆسەکە، هەموو ئەوانەشى باس دەکرێت هێشتا نەگەشتووەتە ئەنجامى تەواوەتى کە وەک چارەسەرى کۆتایى بۆ کۆرۆنا بەکاربهێنرێت”.
د.تەها مەحووى، پزیشکى پسپۆرى نەخۆشیەکانى هەناوى ڕایگەیاند: “کۆرۆنا بوونى هەیە و با بە سیاسى نەکرێت، چونکە ڕۆژانە ڕێژەى توشبوون و مردن بەرزتر دەبێتەوە کارمەندى پزیشکى گیان لەدەست دەدات، بۆ ئەوەى کارەسات نەخولقێت تاکە چارەسەر تاک پارێزیە”.
