حكومه‌تى هه‌رێم نزیكه‌ى سێ ملیۆن دۆلارى داوه به كۆمپانیاى گڵف كیستۆن
لۆگۆى حكومه‌تى هه‌رێمى كوردستان | فۆتۆ: SNN
حكومه‌تى هه‌رێمى كوردستان نزیكه‌ى سێ ملیۆن دۆلار شایسته‌ى دارایی كۆمپانیاى گڵف كیستۆنى داوه له پاره‌ى ئه‌و نه‌وته‌ى كه له مانگى ئایاردا فرۆشتوویه‌تى.
كۆمپانیاى گڵف كیستۆن كه كۆمپانیایه‌كى بیانییه و له كێڵگه‌ى نه‌وتى شێخان له باكوورى رۆژئاواى هه‌ولێر له هه‌رێمى كوردستان كارده‌كات له بوارى كنه و پشكنین و به‌رهه‌مهێنانى نه‌وت، له به‌یاننامه‌یه‌كدا ئاشكرایكرد، “له پاره‌ى نه‌وتى فرۆشراوى هه‌رێم بڕى 2.7 ملیۆن دۆلارى وه‌رگرتووه، له‌و بڕه‌ش یه‌ك ملیۆن دۆلارى ده‌بێته سه‌رمایه بۆ كۆمپانیاكه”.
بڵاوبوونه‌وه‌ى ئه‌م هه‌واڵه له‌كاتێكدایه كه رۆژى 19ى حوزه‌یران، كۆمپانیاكه ئاشكرایكرد، “به‌هۆى ناجێگیرى نرخى نه‌وت و بازاڕه داراییه‌كان بڕیاریداوه به‌ڕێژه‌ى 40٪ى هێزى كارى خۆى واز لێبهێنێت، كه به‌رامبه‌ره به 400 كارمه‌ند”.
هه‌ر له‌وباره‌یه‌وه جۆن فێره‌ر، به‌ڕێوه‌به‌رى گشتى كۆمپانیاكه رایگه‌یاند: “ئێمه ئه‌و بڕیاره‌ى كه دامان به‌هۆى بڵاوبوونه‌وه‌ى ڤایرۆسى كۆرۆنا و ئه‌و قه‌یرانه داراییه‌وه بوو كه رووى تێكردین”.
ئه‌م كۆمپانیایه كه له ساڵى 2001 دامه‌زراوه و چه‌ندین ساڵه له هه‌رێمى كوردستان كارده‌كات، خاوه‌نى 80٪ى قازانجى كێڵگه‌ى نه‌وتى شێخانه
