تورکیا لە رێگەی دراوەکەیەوە چنگ لە باکووری سوریا گیردەکات
شاری ئیدلیب لە سوریا، وێنە: Daily Sabah
SNN
تورکیا لیرەی تورکی دەخاتە بازاڕەکانی ئەو ناوچانەی باکووری سووریا کە کەوتوونەتە ژێر دەسەڵاتی هێزەکانی تورکیا و گروپە چەکدارییەکانیەوە، لەو رێگەیەشەوە هەژموونی خۆی بەهێزتر دەکات و دراوی سووریش لاوازتر دەکات.
رۆژنامەی عەرەب نیوزی سەر بە سعودیە لە راپۆرتێکیدا نوسیویەتی: تورکیا لە رێگەی بانکەکانیەوە کە لقیان لە باکووری سووریا کردووەتەوە، مامەڵەی بە لیرەی تورکی لە باکووری سووریا زیادکردووە، هاوکات مووچەخۆرانی ئەو ناوچانەش بە دراوی تورکی مووچەیان پێدەدرێت و خۆراک و شتومەکیش لە بازاڕەکانی باکووری سووریا بە دراوی تورکی کڕین و فرۆشتنیان پێوەدەکرێن.
لەلایەکی دیکەوە گروپی چەکداری دەستەی تەحریر شام، کە گروپێکی توندڕەون و کۆنتڕۆڵی ئیدلیبیان کردووە دەستیان کردووە بە بەکارهێنانی لیرەی تورکی لە مامەڵە و کاروبارەکانیاندا.
ئەمە لەکاتێکدایە، ئەمریکا بەنیازە لە رێگەی یاسایەکی نوێیەوە، حکومەتی سوریا و ئابووری ئەو وڵاتە بکاتە ئامانج.
رۆژنامە سعودیەکە نوسیویەتی، ئەنقەرە پێشوازی لەو سزایانەی ئەمریکا دەکات و هیواخوازە ببێتە هۆی روخانی حکومەتی سوریا و هەژموونی خۆی لە وڵاتەکە بەهێزتر بکات.
