تەنیا حەوت ملیۆن دینار وەك پارەی هاندان بۆ پزیشكان و كارمەندانی تەندروستی هەڵەبجە كۆكراوەتەوە

SNN-عەلی حەمە سەعید

دوای ئەوەی لە كۆبوونەوەی پێشووی ژووری ئۆپراسیۆنەكانی پارێزگای هەڵەبجە بڕیاردرا كە وەك هاوكارییەك هاندان بۆ پزیشكان و كارمەندانی تەندروستی لە نەخۆشخانەی وەفا خەرجبكرێت، بەڵام تا ئێستا لەلایەن رێكخراوێكی خێرخوازییەوە تەنها حەوت ملیۆن دینار دابینكراوە.

د. ئازاد مستەفا، بەڕێوەبەری گشتی تەندروستی هەڵەبجە بە SNNی راگەیاند: دوای ئەوەی لە كۆبوونەوەی پێشووتری ژووری ئۆپراسیۆنەكانی پارێزگای هەڵەبجە بڕیار لەسەر خەرجكردنی پارەی هاندان بكرێت بۆ ئەو پزیشك و كارمەندانەی كە لە نەخۆشخانەی (وەفا)ی تایبەت بە تووشبووانی كۆرۆنا كاردەكەن، بەڵام تا ئێستا نەتواندراوە كارێكی ئەوتۆیان بۆ بكرێت.

ئاماژەی بەوەشكرد، تەنها لەلایەن رێكخراوێكی خێرخوازییەوە بڕی حەوت ملیۆن دینار كۆكراوەتەوە و هەر ئەو رێكخراوە خۆیشی دابەشی كردووە بەسەر پزیشكان و كارمەندانی ناو نەخۆشخانەكە كە نزیكەی 60 پزیشك و كارمەند دەبن.

بەڕێوەبەری گشتی تەندروستی هەڵەبجە ئەوەشی خستەڕوو، داوا لە سەرمایەداران و خێرخوازان دەكەین كە هاوكارمان ببن بۆ ئەوەی بتوانین لەو رێگەیەوە بڕێك پارە كۆبكەینەوە و وەك پارەی هاندان دابەشی بكەین بەسەر پزیشكان و كارمەندانی تەندروستی نەخۆشخانەی وەفا كە لە پێناو تووشبووانی كۆرۆنا لە سنورەكەدا ژیانی خۆیان و خێزانەكانیان خستوەتە مەترسییەوە.