ئاسایشی سلێمانی دەستگیرکردنی 31 کەس رادەگەیەنێت
ئەمڕۆ یەکشەممە 26ى نیسان بەشى ماددە هۆشبەرەکان لە ئاسایشى سلێمانى دەستگیر کردنى 31 کەسى ڕاگەیاند کە لەماوەى کەرەنتیەنەدا لە مارکێت و دوکانەکان دزیان کردووە، ماددەى هۆشبەریان پێ کڕیوە.
جەلال مینە بەگ بەڕێوەبەرى بەشى ماددە هۆشبەرەکان لە ئاسایشى سلێمانى ڕایگەیاند “لە کاتى مانەوە و قەدەغەدا لەتاو ڤایرۆسى کۆرۆنا هێزەکانمان سەرقاڵى قەدەغەى هاتوچۆ بوون کەسانێک ئەو هەلەیان قۆستۆتەوە و لە چەند دوکان و مارکێتێک دزییان کردووە و بە پارەکەى ماددەى هۆشبەریان کڕیوە”.
وتیشى: “هێزەکانمان لە پاڵ ئەرکى قەدەغەى هاتوچۆ و هۆشیارى سەبارەت بە ڤایرۆسى کۆرۆنا توانویانە31 کەس دەستگیر بکەن کە مادەى هۆشبەریان بەکارهێناوە و دزییان لە دوکان و مارکێتەکاندا کردووە و لەنێو ئەو دەستگیرکراونەدا 2 ئافرەتى تێدایە”.
ڕوونیشیکردەوە “داخستنى سنوورەکان ڕۆڵێکى باشی هەبوو لە کەمبوونەوەى ماددەى هۆشبەر، چونکە ماددەى هۆشبەر لە ناوخۆدا بەرهەمناهێنرێت، بەڵکو لە سنوورەکانەوە هاوردە دەکرێت”.
