سلێمانی.. لە سبەینێوە دەرمانێکی تایبەت بۆ تووشبووانی کۆرۆنا بەکاردەهێنرێت

SNN

بەڕێوەبەری نەخۆشخانەی جمهوری سلێمانی کە لە ئێستادا نەخۆشخانەکە بۆ چارەسەری کۆرۆنا تەرخانکراوە، باس لە رەوشی تووشبووان دەکات و دەشڵێت: “لە سبەینێوە دەرمانێکی تایبەت بۆ تووشبووان بەکاردەهێنین کە بەرگری لەشی ئەو کەسانە بەرزدەکاتەوە کە هەوکردنی سییان هەیە”.

د.داهات حەوێزی بەڕێوەبەری نەخۆشخانەی جمهوری سلێمانی رایگەیاندووە: “رۆژانە نزیکەی 100 نەخۆش لە چوار قاوشدا چارەسەریان بۆ دەکرێت (ئەمڕۆ 115 نەخۆشی لێبوە)”.

باسی لەوەشکرد: “ڕۆژانە نزیکەی 20 نەخۆش رەوشیان بەرەو باشی دەچێت و  دەیاننێرینەوە بۆ تەواو کردنی چارەسەرەکەیان لە ماڵەوە یان لە ئوتێلە تەرخانکراوەکان”.

وتیشی: “رۆژانە نزیکەی 10 نەخۆش پلازمایان بۆ دەنوسین، بەشی زۆر لەو نەخۆشانە پلازمایان دەست دکەوێت، بەشێکیشیان ئێمە هاوکاریان دەکەین”.

دەشڵێت: “رۆژانە نزیکەی پێنج نەخۆش باری تەندروستیان تێکدەچێت و پێویستیان بە ئامێری هەناسەدانی دەستکرد دەبێت و بەپێی هەبوونی جێگا دەیاننێرین نەخۆشخانەی شەهید ئاسۆ، رۆژانە چەند حاڵەتێکی کەمی مردن لە جمهوری تۆمار دەکرێت”.

بەڕێوەبەری نەخۆشخانەی جمهوری راشیگەیاندووە: “ئەوەی جێگای دڵخۆشیە زۆرێک لەو نەخۆشانەی پلازما وەردەگرن سوودی زۆری لێ دەبینن و دوای دوو بۆ سێ ڕۆژ لە نەخۆشخانە دەریان دەکەین، ئێستا خەڵکێکی زۆر ڕوودەکەنە بانکی خوێن بۆ پێدانی پلازما و ڕۆژانە زۆرێک لەو نەخۆشانەی کە 14 ڕۆژ بەسەر چاکبوونەوەیان تێپەڕیوە خۆیان دەچن بۆ بەخشینی پلازما”.

ئەوەشی خستەڕوو: “لە سبەینەوە دەست دەکەین بە دەرمانێکی تایبەت بە بەرزکردنەوەی بەرگری لەو کەسانەی تووشی هەوکردنی سەختی سییەکان بوون”.

سەبارەی بە جێبەجێکردنی رێنماییە تەندروستییەکان ناوبراو وتی: “سوپاس بۆ خوا ئێستا پابەندی خەڵک باشتربوە و ماسک و دەستکێش زۆر بەکاردەهێنن”.