ئه‌مریكا له‌باره‌ى كوشتنى قاسم سوله‌یمانى وه‌ڵامى نه‌ته‌وه یه‌كگرتووه‌كانى دایه‌وه
ژوورى كۆنگره‌ى رۆژنامه‌وانى له وه‌زاره‌تى به‌رگریی ئه‌مریكا | فۆتۆ: REUTERS / AL DRAGO
كه‌مێك له‌مه‌وبه‌ر وه‌زاره‌تى به‌رگریى ئه‌مریكا رایگه‌یاند: له‌به‌ر ئه‌وه قاسم سوله‌یمانیمان به ئامانج گرتووه، چونكه سه‌رقاڵى پلاندانانبوو بۆ هێرشێكى گه‌وره كه به‌رژه‌وه‌ندى ئه‌مریكاى ده‌خسته مه‌ترسییه‌وه.
ئه‌مڕۆ سێشه‌ممه ئه‌گنێس كالامارد، بڕیارده‌رى یاسایی نه‌ته‌وه یه‌كگرتووه‌كان له راپۆرتێكدا كه له‌باره‌ى كوشتنى قاسم سوله‌یمانی بڵاویكرده‌وه رایگه‌یاند: “رووداوى كوشتنى قاسم سوله‌یمانی رووداوێكى ناياساییه و ویلایه‌ته یه‌كگرتووه‌كانى ئه‌مریكا لێى به‌رپرسه”.
له وه‌ڵامى راپۆرته‌كه‌ى نه‌ته‌وه یه‌كگرتووه‌كاندا كه‌مێك له‌مه‌وبه‌ر وه‌زاره‌تى به‌رگریی ئه‌مریكا رایگه‌یاند: “كوشتنى قاسم سوله‌یمانی هۆكارى تایبه‌تى خۆى هه‌بووه، له‌به‌ر ئه‌وه به ئامانجمانگرتووه، چونكه سه‌رقاڵى پلاندانانبوو بۆ هێرشێكى گه‌وره كه به‌رژه‌وه‌ندى ئه‌مریكاى ده‌خسته مه‌ترسییه‌وه ئه‌گه‌ر سه‌رى بگرتایه”.
رۆژى 3ى كانونى دووه‌مى 2020، قاسم سوله‌یمانى، فه‌رمانده‌ى فه‌یله‌قى قودسى سوپاى پاسدارانى ئێران به فه‌رمانى دۆناڵد تره‌مپ، سه‌رۆكى ئه‌مریكا بووه ئامانجى فڕۆكه‌كانى ئه‌مریكا و خۆى و پاسه‌وانه‌كانى هاوشان له‌گه‌ڵ ئه‌بوو مه‌هدى موهه‌ندیس، فه‌رمانده‌ی عێراقى كوژران له نزیك فڕۆكه‌خانه‌ى نێوده‌وڵه‌تى به‌غدا.
