هۆكاری رانەگەیاندنی وادەی دابەشكردنی مووچەی خانەنشینان ئاشكرا دەکرێت

SNN- عەلی حەمە سەعید

بەرپرسێكی وەزارەتی دارایی هۆكاری رانەگەیاندنی مووچەی خانەنشینان ئاشكرا دەكات و ئاماژە بەوە دەكات لە هەفتەی داهاتوودا مووچەی ئەوانیش خەرجدەكرێت.

بە گوێرەی زانیارییەکانی SNN كە لە بەرپرسێكی وەزارەتی داراییەوە وەریگرتووە، لەگەڵ ئەوەی وادەی دابەشكردنی سەرجەم وەزارەت و دەستەكان لەلایەن وەزارەتی داراییەوە راگەیەندراوە، بەڵام تا ئێستا نەتواندراوە لیستی مووچەی خانەنشینانی سەربازی و شارستانی لە لێبڕینی لە %21 تەواو بكرێن، ئەوەش بەهۆی زۆری ژمارەی خانەنشینان و نەبوونی وەزارەتێكی تایبەت بە راپەڕاندنی ئیش و كاری ئەو خانەنشینانە.

ئاماژەی بەوەشكرد: هەموو ئەو خانەنشینانەی كە لە سەروو 300 هەزار دینار وەردەگرن، ئەوانیش هاوشێوەی فەرمانبەرانی دیكەی وەزارەتەكانی دیكە رێژەی لە %21 لە مووچەكانیان دەبڕدرێت ئەوانەشی لە خوار 300 هەزار دینارەوە مووچە وەردەگرن دەستكاری مووچەكانیان ناكرێت، بۆ ئەو مەبەستەش فەرمانبەرانی بەڕێوەبەرایەتی گشتی خانەنشینی هەرێم سەرقاڵی ئامادەكردنی لیستی مووچەی خانەنشینانی سەربازی و شارستانین.

ئەو بەرپرسەی وەزارەتی دارایی دڵنیایی دایە خانەنشینانی هەرێم كە لە دوای تەواوبوونی لیستی مووچەكانیان لە هەفتەی داهاتوو دەستدەكرێت بە دابەشكردنی مووچەكانیان، چونكە نزیكەی 140 هەزار خانەنشین بڕیاری لێبڕینی لە %21 مووچە دەیانگرێتەوە.

بە گوێرەی ئامارەكانی وەزارەتی دارایی زیاتر لە 244 هەزار خانەنشین لە هەرێمی كوردستان مووچە وەردەگرن كە مانگانە پێویستیان بە زیاتر لە 110 ملیار دینار هەیە بۆ دابەشكردنی مووچەكانیان.