خاوەنی کۆمپانیای تێسلا لە رۆژێکدا شەش ملیار دۆلاری قازانج کرد

SNN

خاوەنی کۆمپانیای تێسلای بەرهەمهێنەری ئۆتۆمبێل لە یەک رۆژدا شەش ملیار دۆلاری قازانج کرد و پشکی کۆمپانیاکەی بە رێژەی  10.8% بەرزبووەوە، بەهای پشکەکانیشی گەیشتە 286 ملیار و 500 ملیۆن دۆلار.

ماڵپەڕی بلومبێرگی ئەمریکی بڵاویکردەوە، ئیڵۆن ماسک بەڕێوەبەری جێبەجێکاری کۆمپانیاکە بوو بە حەوتەمین دەوڵەمەندترین کەس لە جیهاندا.

ماسک بە رێژەی 20.8% پشکی لە کۆمپانیای تێسلادا هەیە و سامانەکەی دەگاتە 60 ملیار دۆلار.

جگە لە کۆمپانیای تێسلا، ماسک خاوەنی گەورەترین پشکی کۆمپانیای سپەیس ئێکسە، هەروەها خاوەنی پشکی کۆمپانیایەکی دروستکردنی تونێلە.

لەدوای ئەو قازانجەی کە کردی، سامانەکەی ماسک لە وارن بەفێتی خاوەنی کۆمپانیای بێرکشایەر هازەوەی زیاتربوو، کە بە یەکێک لە سەرکەوتووترین وەبەرهێنەرانی ئەمریکا دادەنرێت.

ئەوەش دوای ئەوەی بەفێت بڕی سێ ملیار دۆلاری لە پشکی کۆمپانیاکەی بۆ بواری خێرخوازی تەرخانکرد.