وەزیری دەرەوەی ئەڵمانیا: نابێت دەستوەردان لە کاروباری عێراقدا بکرێت

SNN

وەزیری دەرەوەی ئەڵمانیا رایگەیاند: قورسایی سیاسی و ئابووری خۆمان لە ناوچەکە دەخەینەگەڕ، بە ئامانجی ئەوەی دەستوەردان لە کاروباری ناوخۆی عێراقدا نەکرێت.

هێیكۆ ماس لە پەیوەندییەکی تەلەفۆنیدا لەگەڵ وەزیری دەرەوەی عێراق باسی لەوەشکرد: “سیاسەتی نوێی دەرەوەی عێراق پشت بە پەیوەندییەكی هاوسەنگ لەگەڵ سەرجەم وڵاتانی دراوسێ دەبەستێت، ئەویش لەسەر بنەمای باشی دراوسێیەتی، بەدیهێنانی بەرژەوەندییە هاوبەشەكان، چارەسەركردنی كێشەكان بە ئاشتی، لەگەڵ دوورخستنەوەی عێراق و گەلەكەی لە گرژییە هەرێمی و نێودەوڵەتییەکان”.

هێیكۆ ماس روونی كردەوە: سیاسەتی عێراق لە دامەزراندنی پەیوەندیی لەگەڵ وڵاتانی هەرێمیی بە ئاراستەیەكی راست و دروست دەڕوات، جەختیكردووەتەوە لەسەر ئەوەی كە ئەڵمانیا لە سەرجەم بوارەكاندا پاڵپشتی لە عێراق دەكات.

هێیكۆ ماس ئاشكراشی كردووە: ئەڵمانیا كە هەفتەی داهاتوو سەرۆكایەتی كۆبوونەوەی وەزیرانی دەرەوەی یەكێتیی ئەورووپا دەكات، هەوڵی زیاتر بە ئامانجی چارەسەركردنی پرسی دەرهێنانی عێراق لەنێو لیستی وڵاتە زۆر مەترسیدارەكان سەبارەت بە سپیكردنەوەی پارە و پارەداركردنی تیرۆر، دەخاتەگەڕ و راشیگەیاندووە كە كۆمپانیاكانی ئەڵمانیا خواستیان هەیە بۆ كاری وەبەرهێنان روو لە عێراق بكەن.