“وەرگرتنى پارەی پشکنینی کۆرۆنا لەلایەن حکومەتەوە لە بازگەکان نایاساییە”

SNN-هەوراز ئەحمەد

ئەندامێکى پەرلەمانى کوردستان رایدەگەنێت: “بەپێى دەستورى عێراقى خزمەتگوزارى تەندروستى دەبێت بۆ هاووڵاتیان بێ بەرامبەر بێت، ئەوەشى باس لە وەرگرتنى پارە دەکرێت لە بازگەی هەولێر بەناوى پشکنینى کۆرۆناوە ئەگەر بە ناوى حکومەتەوە بێت ئەوا کارێکى تەواو نایاساییە”.

جەلال محەمەد، ئەندامى پەرلەمانى کوردستان بە SNNی راگەیاند: “پەرلەمان و حکومەتیش لە بەرامبەر پێشکەشکردنى خزمەتگوزارى تەندروستى ناتوانن هیچ بڕە پارەیەک لە هاووڵاتیان وەربگرن چ جا پارێزگارێک، مەگەر لە کاتێکدا بکرێتە پرۆژەیەک و بدرێتە کەرتى تایبەت”.

وتیشى: “لە دەستورى عێراقیدا هاتوە نابێت حکومەت هیچ بڕە پارەیەک لە بەرامبەر پێشکەشکردنى خزمەتگوزارى تەندروستى لە هاووڵاتیان وەربگیرێت، ئەگەر ئەو پشکنینەى باس دەکرێت لە بازگەى هەولێر دابنرێت و لایەنى حکومى سەرپەرشتى بکات و نەدرێـتە کەرتى تایبەت کارێکى نایاساییە”.

جێگاى ئاماژە پێکردنە، دوێنى دووشەممە فرسەت سۆفی پارێزگاری هەولێر لەکۆنگرەیەکی رۆژنامەنووسیدا رایگەیاند: لەمەودوا لە هەموو بازگەکانی سنووری پارێزگای هەولێر پشکنین دادەنێین، ئەو هاووڵاتییەی دەیەوێت داخڵی هەولێر بێت بە نرخێکی دیاریی کراو پشکنینی بۆ دەکرێت کە لە 50 هەزار دینار تێناپەڕێت بەتایبەت بۆ ئەو هاووڵاتییانەی لەپارێزگاکانی عێراقەوە دێن، لەوانەیە بۆ هاووڵاتییانی هەرێمی کوردستان میکانیزمێکی جیاوازی هەبێت.