کۆرۆنا زۆرترین زیانی بە کۆمپانیا بچوک و مامناوەندەکان گەیاندووە
SNN
بە گوێرەی راپرسییەک، بڵاوبوونەوەی ڤایرۆسی کۆرۆنا و ئەو قەیرانە داراییەی کە بەدوای خۆیدا هێناویەتی، زۆرترین زیانی بە کۆمپانیا بچوک و مامناوەندەکانی جیهان گەیاندووە.
کۆمپانیای فەیسبووک بە هاوکاری بانکی جیهانی لە راپرسییەکیدا ئاشکرایکردووە، قەیرانی دارایی سێیەکی کۆمپانیاکانی جیهانی ناچارکردووە ژمارەی کارمەندەکانیان کەمبکەنەوە.
لە کۆی 30 هەزار بەڕێوەبەری کۆمپانیا بچوک و مامناوەندەکانی 50 وڵاتی جیهان کە لە راپرسییەکەدا بەشدارییان کردووە، 26%یان باسیان لەوەکردووە ناچاربوون بەهۆی قەیرانی داراییەوە ژمارەی کارمەندی کۆمپانیاکانیان کەمبکەنەوە.
54%ی ئەو کۆمپانیایانەی کە بەهۆی قەیرانی داراییەوە لە جیهاندا داخراون لە کەرتی گەشتیاریدا کاردەکەن، لەدوای کەرتی گەشتیاریش ئەو کۆمپانیایانەی کە تایبەتن بە رێکخستنی بۆنە و ئاهەنگەکان زۆرترین زیانیان بەرکەوتووە.
لە راپرسیەکەدا ئەوەش خراوەتەڕوو: ئەو کۆمپانیایانەی کە خاوەنەکانیان ژنن زیاتر زیانیان بەرکەوتووە بەراورد بەو کۆمپانیایانەی کە خاوەنەکانیان پیاون.
پێشتر بانکی جیهانی قەبارەی ئەو زیانانەی کە بەر کۆمپانیاکانی جیهان کەوتووە بە سێ تریلیۆن و 800 ملیار دۆلار مەزەندە کرد.
