پڕۆژەیەکی گاوداری پێداویستی شیرەمەنی پارێزگای هەڵەبجە پڕدەکاتەوە

SNN-عەلی حەمە سەعید

لە ئێستادا گەورەترین پرۆژەی گاوداری تایبەت بە بەخێوكردنی مانگای شیردەر بە شێوەیەكی زانستی لە پارێزگای هەڵەبجە دەستیبەكاركردووە، كە زیاتر لە 400 سەر مانگای سیمیتاڵ لەخۆدەگرێت و رۆژانە زیاتر لە یەك تۆن و نیو شیر و بەرهەمەكانی دیكەی شیرەمەنی دەخاتە بازاڕەوە، پێداویستی شیرەمەنی سنوری پارێزگای هەڵەبجە و دەوروبەری پڕدەكاتەوە.

حەمید عەبدوڵا، خاوەن یەكەم پرۆژەی گاوداری هەڵەبجە بە SNNی راگەیاند: سنووری پارێزگای هەڵەبجە و هەورامان و شارەزوور لە رووی كشتوكاڵ و ئاژەڵدارییەوە گرنگی تایبەتی خۆی هەیە و شوێنێكی لەبارن، بۆیە بۆ سودوەرگرتن لە هەڵكەوتەی شوێنی جوگرافی و لەباری سنوورەكە بۆ كاری ئاژەڵداری بە گرنگمان زانی كە گەورەترین پرۆژەی بەخێوكردنی مانگای شیردەر و ئاژەڵی بەرهەمهێنی گۆشت بكەینەوە و سەركەوتووش بووین لەكارەكەماندا”.

ئاماژەی بەوەشكرد: لە پرۆژەكەدا زیاتر لە 400 سەر مانگای شیردەری تێدا بەخێودەكرێت، لە هەموو رووەكانەوە كۆنترۆڵی تەندروستی دەكرێت، بۆ پاراستنیان لە نەخۆشی، ئەندازیاری تایبەتی بواری كشتوكاڵ و ئاژەڵداری سەرپەرشتی و چاودێری پرۆژەكە دەكات و توانیومانە پێداویستی پارێزگای هەڵەبجە، هەروەها بەشێكی بازاڕی سلێمانی لە بەرهەمی ماست و شیر و بەرهەمەکانی دیكەی شیرەمەنی پڕبكەینەوە.

خاوەنی پرۆژەی گاوداری هەڵەبجە ئەوەشی خستەڕوو: پرۆژەكەمان لەسەر رووبەری پێنج دۆنم زەوی دروستكراوە، لەلایەن بەڕێوەبەرایەتی كشتوكاڵی هەڵەبجەوە بۆمان جیاكراوەتەوە و لە پرۆژەكەدا تەنها مانگای شیردەر بەخێوناكرێت، بەڵكو مانگای گۆشتیش بەخێودەكرێت، دوای هەشت مانگ لە بەخێوكردنی هەر مانگایەك 600 كیلۆ گۆشتی سووری لێبەرهەمدێت ئەو مانگایانەی لێرە بەخێودەكرێت جۆری (سمیتاڵە)، رۆژانە یەك تۆن و نیو شیر بەرهەممان دەبێت.