د.هەڤاڵ ئەبوبەکر: رەوشی کۆرۆنا لە سلێمانی بەرەو کۆنتڕۆڵکردن دەچێت

SNN-هەوراز ئەحمەد

پارێزگاری سلێمانی رایگەیاند: بەهۆی خۆپارێزی هاووڵاتییانی پارێزگای سلێمانی رەوشی تەندروستی پارێزگاکە بەرەو کۆنتڕۆڵکردن دەچێت و جارێکی دیکە قەدەخەی هاتووچۆ راناگەیەندرێت.

د.هەڤاڵ ئەبوبەکر پارێزگاری سلێمانی لە لێدوانێکیدا بۆ SNN رایگەیاند: “دۆخی کۆرۆنا لە پارێزگای سلێمانی زۆر باشە و خۆپارێزی گشتی دروستبووە، ژمارەی چاکبوونەوە لە ڤایرۆسی کۆرۆنا لە ژمارەی تووشبووان زیاترە”.

ئاماژەی بەوەشکرد: “تا ئێستا هیچ بڕیارێک لەبارەی کردنەوەی مزگەوتەکان نەدراوە، بەڵام بەمنزیکانە ژووری ئۆپراسیۆنەکانی پارێزگای سلێمانی کۆدەبێتەوە و تاوتوێی کردنەوە یان نەکردنەوەی ئەو شوێنانەی کە بەهۆی کۆرۆناوە داخراون، دەکات”.

27ی مانگی حوزەیرانی رابردوو لیژنەی باڵای ئۆپراسیۆنەکانی پارێزگای سلێمانی لە دوایین بڕیاریدا رایگەیاندبوو: مزگەوت و پەرستگا و شوێنە ئایینیەکان بە داخراوی دەمێننەوە و هەموو نۆرینگە ئەهلییەکانی ددان دادەخرێن و چێشتخانەکان تەنیا بە دیلیڤەری دەتوانن کاربکەن و کافتریا و مەلەوانگەکان و شوێنەکانی کاتبەسەربردن بە داخراوی دەمێننەوە.