وەزیری دەرەوەی ئێران گەیشتە بەغدا

SNN-

باڵیۆزخانەی ئێران لە بەغدا رایگەیاند: “ئەمڕۆ یەکشەممە 19ی تەمموز محەمەد جەواد زەریف وەزیری دەرەوەی ئێران بەسەردانێک گەیشتۆتە بەغدا و چاوی بە ژمارەیەک بەرپرسی باڵای عێراق دەکەوێت”.

ئاژانسی هەواڵی ئێرنا بڵاویکردۆتەوە: “وەزیری دەرەوەی ئێران وەفدێک یاوەریی دەکات و باسی فراوانکردنی پەیوەندییەکانی تاران و بەغدا دەکات”.

زەریف لەگەڵ گەیشتنی بۆ بەغدا کۆبوونەوەیەک دەکات لەگەڵ فوئاد حسێن وەزیری دەرەوەی عێراق و دواتر پێکەوە کۆنگرەیەکی رۆژنامەوانی ساز دەکەن.

بڕیارە زەریف لە میانەی ئەو سەردانەیدا چاوی بە بەرپرسە باڵاكانی حكومەتی عێراق بکەوێت كە بەرهەم ساڵح سەرۆككۆمار و مستەفا كازمی سەرۆكوەزیرانی عێراق و محەمەد حەلبوسی سەرۆكی ئەنجومەنی نوێنەرانی عێراق و فالح فەیاز سەرۆكی دەستەی حەشدی شەعبی و هادی عامری سەرۆكی هاوپەیمانی فەتح و عەممار حەكیم سەرۆكی رەوتی حیكمە-ن.