تورکیا هاوکاری وەزارەتی تەندروستیی هەرێم دەکات
وێنەی ساتی گەیشتنی هاوکارییەکە/ فۆتۆ: SNN
SNN- مەودا مستەفا
ئەمڕۆ یەکشەممە لەلایەن کۆمپانیایەکی تورکی پێداویستی پزیشکی تایبەت بە رووبەڕووبوونەوەی کۆرۆنا کە لە پێنچ جۆر پێکهاتووە، گەیشتە دەست وەزارەتی تەندروستیی هەرێم.
سامان بەرزنجی، وەزیری تەندروستی هەرێم لەکۆنفرانسێکی ڕۆژنامەوانیدا رایگەیاند: بەئامادەبوونی کونسوڵی تورکیا لەهەرێمی کوردستان، لەلایەن کۆمپانیایەکی تورکی کە ماوەیەکی زۆرە لە هەرێمی کوردستان کار دەکات پێداویستی پزیشکی کە لە پێنچ جۆر بابەت پێکهاتووە، پێشکەش بە وەزارەتی تەندروستی کرا تاوەکو بەسەر پارێزگاکانی هەرێمدا دابەشبکرێت.
وتیشی: “پێداویستییەکان بریتین لە پۆشاکی تیمی تایبەت بە بەرەنگاربوونەوەی کۆرۆنا لەناوەندە پزیشکییەکان و چاویلکەی تایبەت و دەمامک و چەند بابەتێکی تر، کە زۆر گرنگ بوون بۆ ئێستای هەرێمی کوردستان، چونکە ژمارەیەکی زۆر لەتووشبووان ئێستا رۆژانە تۆمار دەکرێن و ژمارەیەکی زۆر پزیشک و کارمەندانی تەندروستی تووشی ڤایرۆسەکە بوون”.
لای خۆشیەوە، هاکان کاراچای، کونسوڵی تورکیا لە هەولێر رایگەیاند: ئەو هاوکارییانە لەناو تورکیاوە لەلایەن کۆمپانیای ماکسی مۆڵ رێکخراوە بۆ هەرێم کوردستان و بەغدا، ئێستا ئەو هاوکارییانە رادەستی حکومەتی هەرێم کراوە، تورکیا لەگەڵ عێراق و هەرێم و ناوچەکه بەردەوام هاوکار و پشتیوانە لەڕووی مرۆییەوە بەتایبەت لە رووبەڕووبونەوەی کۆرۆنا و پێشکەشکردنی پێداویستی پزیشکی.
