لە هەولێر ڤایرۆسی کۆرۆنا گەیشتە هۆڵەكانی تاقیكردنەوە

SNN- مەودا مستەفا
بەڕێوەبەری گشتی پەروەدەی هەولێر رایدەگەیەنێت “چەندین حاڵەتی تووشبوون بە ڤایرۆسی کۆرۆنا لە هۆڵەكانی تاقیكردنەوەی خوێندکاران تۆمار كراون”.

ئەمرۆ یەكشەممە بەشدار عەبدولخالق بەڕێوەبەری گشتی پەروەردەی هەولێر  بەSNNی رایگەیاند “لە كۆی 11 پەروەردەی قەزاكانی سەر بە پارێزگای هەولێر، 811 هۆڵی تاقیكردنەوەمان هەیە 51 هەزار و شەش سەدو پەنجاو یەك خوێندکار بەشداری ئەزمونەكانی پۆلی 12 دەكەن، ئەمساڵ ژمارەی خوێندکارانی بەشدار بوو زۆرترە بە بەراورد لەگەڵ ساڵانی پێشوو، بۆیە هانامان بۆ وەزارەتی خوێندنی باڵا بردووە بۆ بەكارهێنانی هۆڵی زانكۆكان و كۆلێژەكان وەك زانكۆی سەڵاحەدین و نۆلێج و جیهان .
دەربارەی هەماهەنگی پەروەردە و تەندروستی، بەڕێوەبەری گشتی پەروەردەی هەولێر وتی: “كەرتی تەندروستی چاودێری هۆڵەكان دەكەن، بەتایبەت چاودێرەكان و بەڕێوەبەری هۆڵەكان بە بەكارهێنانی دەستكێش و كەمامە”.

ئەوەشی خستە ڕوو: چەندین حاڵەتی تووشبوون بە ڤایرۆسی كۆرۆنا لەكاتی بەڕێوەچوونی تاقیكردنەوەكان لە ریزی خوێندکاران و بەڕێوەبەری هۆڵەكان و چاودێرەكان تۆمار كراوە، هەموو رێكکارێکی پێویست گیراوەتە بەر بۆ گەیاندنیان بە نەخۆشخانە و چارەسەر كردنیان.
بەڕێوەبەری گشتی پەروەردەی هەولێر وتیشی: “هەر خوێندکارێک تووشی کۆرۆنا بێت، بۆی قەرەبوو دەكرێتەوە، لەكاتێكی دیاریكراو تاقیكردنەوەكەی بۆ دووبارە دەكرێتەوە”.