كۆبوونەوەی دەستەی سەرۆكایەتیی پەرلەمان هەڵوەشایەوە

SNN- مەودا مستەفا

پاش چاوەڕوانیی زیاتر لە دوو كاتژمێر و ئامادە نەبوونی سەرۆكی پەرلەمانی كوردستان، كۆبوونەوەی دەستەی سەرۆكایەتیی پەرلەمانی كوردستان بۆ سبەی یاخود رۆژی یەكشەمەی هەفتەی داهاتوو دواخرا .

پەیامنێری SNN لە نێو پەرلەمانی كوردستان ڕایگەیاند “هەرچەندە بڕیار بوو كاتژمێر 10ی بەیانی ئەمڕۆ چوارشەممە كۆبوونەوە بە ئامادەبوونی سەرۆكی پەرلەمان و جێگر و سكرتێری پەرلەمان ئەنجامبدرێت، بەڵام بەهۆی ئامادە نەبوونی سەرۆكی پەرلەمان دانیشتنەكە ئەنجام نەدرا”.

بریارە كۆبوونەوەكە بەیانی ئەنجامبدرێت یاخود هەفتەی داهاتوو، ئەمەش دوای ئەوە دێت كە دوێنێ ئومێد خۆشناو سەرۆكی فراكسیۆنی پارتی وتی: “دانیشتنی پەرلەمانی كوردستان بە یەك فراكسیۆنیش بێت دەكرێت” .

بەپێی زانیارییەكانی SNN كۆبوونەوەكە ئەگەری زۆرە بەیانی كاتژمێر 10 و نیوی پێشنیوەڕۆ ئەنجامبدرێت و ئەگەر سەرۆكی پەرلەمانی كوردستان ئامادە نەبێت، ئەوا بەرنامەی كار و رۆژی كۆبوونەوەكە دیاریدەكرێت.