کارمەندە دەستگیرکراوەکانی هاتووچۆی سلێمانی ئازادکران

SNN-هەوراز ئەحمەد

دوای چەند کاتژمێرێک لە دەستگیرکردنیان، پێنج کارمەندی هاتووچۆی سلێمانی ئازادکران و سبەینێش دەوامی ئاسایی لە بەڕێوەبەرایەتی هاتووچۆی سلێمانی دەکرێت.

هەڵگورد مەحمود، کارمەندی هاتووچۆی سلێمانی بە SNNی راگەیاند: “پێنج کارمەندی هاتووچۆی سلێمانی کە ئەمڕۆ لەلایەن هێزێکی ئەمنییەوە بەهۆی رێکخستنی خۆپیشاندان دەستگیرکرابوون، ئازادکران، گرفتەکانی هاتووچۆی سلێمانی لە ئێستادا چارەسەرکراوە و دەوامی ئاسایی بەڕێوەدەچێت”.

پەیامنێری SNN راشیگەیاند: “دوو هاووڵاتیی کە لەنێو کارمەندانی هاتووچۆدا بوون، دەستگیرکرابوون و ئێستا ئەوانیش ئازادکراون”.

به‌یانى ئه‌مڕۆ یەکشەممە به‌شێك له‌ كارمه‌ندانى هاتووچۆ به‌ مه‌به‌ستى ناڕه‌زایه‌تى ده‌ربڕین دژی دواکەوتنی مووچەکانیان، له‌ به‌رده‌م به‌ڕێوەبه‌رایه‌تى هاتووچۆ مانگرتنیان راگه‌یاند و به‌و هۆیه‌شه‌وه‌ ژماره‌یه‌كیان لێده‌ستگیركرا.

مانگی رابردوو کارمەندانی ناڕازی هاتووچۆی سلێمانی مۆڵەتی مانگێکیان دایە بەڕیوەبەرایەتییەکەیان کە بەدەم داواکانیانەوە بێت، ئەمڕۆ 26ی تەمووز ئەو وادەیە کۆتایی دێت.