بە مووشەک هێرش کرایە سەر سەربازگەی تاجی

SNN-

ماوەی چەند مانگێکە بنکە و بارەگاکانی سوپای ئەمریکا بەر هێرشی مووشەکیی دەکەون و لەو چوارچێوەیەشدا ئێوارەی ئەمڕۆ دووشەممە 3 کاتیۆشا سەربازگەی تاجی لەنزیک شاری بەغدای کردە ئامانج.

لەو رۆژەوەی کە قاسم سلێمانی فەرماندەی فەیلەقی قودسی ئێران لە فڕۆکەخانەی بەغدا کوژراوە، هێرش و پەلاماری سەربازیی بۆ سەر بنکە و بارەگاکانی ئەمریکا لە عێراق زیادیکردووە.

ئەم هێرشە مووشەکییانە هاوکاتە لەگەڵ دەستپێکردنی قۆناغەکانی دانوستان لەنێوان ئەمریکا و عێراقدا کە لایەنە ئێرانییەکان لەگەڵی نین و هەوڵی تەگەرە خستنە بەردەمی دەدەن.

لە مانگی ئۆکتۆبەری ساڵی 2019 ەوە تا ئێستا زیاتر لە 30 هێرشی مووشەکیی بەرژەوەندییە دپلۆماتی و سەربازییەکانی ئەمریکای لەعێراق کردۆتە ئامانج.