کەرکوک.. لەلایەن ژنێک و کوڕەکەیەوە لەشفرۆشی بەژمارەیەک کچ کراوە
دوو لەقوربانیانی بازرگانیکردن بەمرۆڤەوە
لەکەرکوک ماڵێک ئاشکرابوو کاری لەشفرۆشی تێدا ئەنجامدراوە، پۆلیس دەڵێت “لەکاتی هەڵکوتانە سەر خانووەکە، دوو لەکچەکان بەزنجیر بەسترابوونەوە و پێشتر لەباندی دیکە کڕدراون”.
لەکەرکوک ماڵێک ئاشکرابوو کاری لەشفرۆشی تێدا ئەنجامدراوە، پۆلیس دەڵێت “لەکاتی هەڵکوتانە سەر خانووەکە، دوو لەکچەکان بەزنجیر بەسترابوونەوە و پێشتر لەباندی دیکە کڕدراون”.
سەرچاوەیەکی ئەمنی باڵا بەSNNی راگەیاند: شەوی رابردوو دوای ئاگادارکردنەوەمان لەبوونی خانوویەک کە بۆ کاری لەشفرۆشی بەکاردەهێنرێت، چوینە سەریان و پێنج کچ لەماڵەکەدا بوون کە تەمەنیان لەنێوان 14 بۆ 16 ساڵ بووە.
سەرچاوەکە روونیکردەوە، دووان لەکچەکان بەزنجیر بەسترابوونەوە لەنێو ماڵەکەدا کە کەوتووەتە گەڕەکی نەسر، سێ کچەکەی تریش هەر یەکێکیان لەژوورێکدا دەرگایان لەسەر داخرابوو.
سەرچاوەکەی پۆلیس وتیشی: “کچەکان هەر یەکێکیان خەڵکی شارێکن و لەماوەی رابردوودا لەلایەن باندەکەی کەرکوکەوە کڕدراون و هێنراون و لەشفرۆشییان پێوە کراوە”.
ئاشکرایکرد، باندەکە بریتین لە ژنێکی بەتەمەن کە تەمەنی نزیکەی 62 ساڵە لەگەڵ کوڕێکی و کەسێکی دیکە وەکو شۆفێر کاری کردووە لایان، تەنها ژنەکە دەستگیرکراوە و کوڕەکەی و شۆفێرەکە هەڵاتوون.
بەپێی زانیارییەکانی SNN خاوەن ماڵەکە ناوی (هـ . ع)یە و لەدایکبووی ساڵی 1952 ە و کووڕەکانی کە ڕایانکردووە ناویان (ع) و (ع)ە و هەڵاتوون.
هەر بەپێی زانیارییەکانیSNN ئەو 5 کچە کە کاری لەشفرۆشییان پێوە کراوە، ناسنامەکانیان بریتین لە (ا.ح) لەدایکبووی 1994 و (ا.ه) لەدایکبووی 1997 و (س.ل) لەدایکبووی 1997 کە هەرسێکیان خەڵکی شاری بەغدان.
دوو کچەکەی دیکە ناویان (ن.م)ە و لەدایکبووی 2002ە و (د.خ) ن کە لەدایکبووی 1992ە و خەڵکی شاری کەرکوکن، لەکاتی هەڵکوتانە سەر ماڵەکە، (س.ل و ن. م) بە زنجیر بەستراونەتەوە و ئەشکەنجە دراون بەهۆی پابەند نەبوون بەفەرمانی خاوەن ماڵ، چونکە بە پارە کاری لەشفرۆشییان پێوە کراوە.
