تاهیر عەبدوڵا: هەر گەشتیارێک ڤیزاکەی لە جۆری (C)یە بۆی نییە گەشت بکات

SNN- هەوراز ئەحمەد

بەڕێوەبەری فڕۆکەخانەی نێودەوڵەتیی سلێمانی دەڵێت: “ئەو کەسانەی ڤیزای شنگنیان هەیە و لە جۆری (C)یە توانای گەشت کردنیان نییە بۆ وڵاتانی دیکە جگە لە تورکیا کە ئاساییە گەشتیار لای ئێمەوە بە هەموو جۆرە ڤیزایەک سەردانی تورکیا بکات”.

تاهیر عەبدوڵا لە پرێس کۆنفرانسێکدا ئەمڕۆ شەممە رایگەیاند “سەرەتا فڕۆکەخانەکانی بەغدا و بەسرە و نەجەف لە 27ی تەمموز دەستیان کرد بە گەشت و ئێمەش ئەمڕۆ دەست بە گەشت دەکەینەوە کە رۆژی 28ی تەمموز لەلایەن حکومەتی هەرێمەوە بڕیاری لێدرا”.

وتیشی: “ئاگاداری هەموو کۆمپانیاکانی رێکخستنی گەشتمان لە کوردستان کردۆتەوە تا رێنماییە تەندروستییەکان جێبەجێبکات بەسەر گەشتیارەکانی خۆیاندا”.

ئاماژەی بەوەشدا “گەشتیار پێویستە لەسەری 4 کاتژمێر زووتر بێتە ناو فڕۆکەخانە بۆ پشکنینی تەندروستی و ئاسایشی و پاککردنەوەی جانتاکانی و بێ دەمامک و دەسکێش کەس ناکرێتە ژوورەوە”.

هێمای بۆ ئەوەشکرد “پێویستە گەشتیار هەموو رێنماییەکانی لەلایەن هێڵی ئاسمانیی رێکخەری گەشتەکەیەوە پێبدرێت و پشکنینی PCR ی کردبێت پێش ئەوەی بێتە ناو فڕۆکەخانەوە”.

راشیگەیاند “ئەو کەسانەی لە ئەوروپا یان لە دەرەوەی هەرێمەوە دێن، تیمی تەندروستیی سلێمانی پشکنینی بۆ دەکات و دەبێت بەڵێننامە بدات تا دەرچوونی ئەنجامەکەی، لە ماڵ نەیەتە دەر”.

وتیشی: “ئەو کەسانەی ڤیزای شنگنیان هەیە و لە جۆری (C)یە، توانای گەشت کردنیان نییە جگە لە تورکیا کە ئاساییە گەشتیار لای ئێمەوە بە ڤیزا سەردانی تورکیا بکات”.

وتیشی: “ئەمشەو سێ گەشتی هاتن و چوون لە فڕۆکەخانەی نێودەوڵەتیی سلێمانییەوە ئەنجامدەدرێت کە لە تورکیا و قەتەرەوە دەبێت”.

بۆ پێشگیری لە بڵاوبوونەوەی ڤایرۆسی كۆرۆنا بە بڕیاری دەسەڵاتی فڕینی شارستانیی عێراق لە 16ی ئازاری ئەمساڵدا گەشتە ئاسمانییەکان لە سەرجەم فڕۆکەخانەکانی عێراق و هەرێمی کوردستان راگیران.