بەژمارە.. گەنجانی تورک داهاتوویان روون نییە لەژێر سایەی ئەردۆغاندا

SNN-

لەگەڵ ئەوەی دەسەڵاتی رەجەب تەیب ئەردۆغان بەردەوام لە هەوڵی ئەوەدایە سەرنجی گەنجانی وڵات بۆ لای خۆی رابکێشێت، بەڵام ئەو توێژە بە جەستە و هەست و بیر و باوەڕ زۆر لە دیدی حکومەتەوە دوورە وەک لە نوێترین راپرسیدا ئاشکرا کراوە.

دامەزراوەی گەیت ستۆن راپۆرتێکی وردی کردووە و دەڵێت: “هەنگاو بە هەنگاو گەنج لە تورکیا لە دید و ئاڕاستەکانی سەرۆکی ئێستای وڵاتەوە دوور دەکەوێتەوە”.

دامەزراوەی سۆدیف-ی کۆمەڵایەتی ئامارێکی کردووە و دەڵێت: “70٪ی گەنجی وڵات توانای فەراهەمکردنی هەلی کار و تواناکانی خۆیان نییە گەر لە دەسەڵاتەوە نزیک نەبن”.

دامەزراوەکە دەشڵێت: “30٪ گەنج لە تورکیا پێیوایە کە بە ئازادیی توانای را دەربڕینی هەیە و دەتوانێت لە سۆشیاڵ میدیا بە ئارەزووی خۆی قسە بکات”.

ئامارەکانی ئەو دامەزراوانە ئاشکرایانکردووە “330289 کەس لەساڵی 2019 دا تورکیای جێهێشتووە و وەک پەنابەر چووەتە وڵاتی دیکە بۆ ژیان و دۆزینەوەی کار و لەو ژمارەیەش 40٪ یان تەمەنیان لە نێوان 20 بۆ 34 ساڵیدایە”.

سيرين سيلفين كوركماز بەڕێوەبەری پەیمانگەی ئیستەنبوڵ بۆ توێژیبەوەی سیاسی دەڵێت: “بێکاریی 25٪ لە تورکیا هەیە و هەموو ئەو لاوانەی بێکارن، ئێستاش پشت بە خانەوادەکانیان دەبەستن بۆ خۆ ژیاندن”.

ساڵی 2019 لە تورکیا 408494 سایت و پێگە لە ئینتەرنێت سانسۆر کراوە جگە لە 7000 ئەژماری تویتەر و 10 هەزار ڤیدیۆ و 6200 پەیج و ئەکاوەنتی فەیسبوک سڕدراونەتەوە.

گەنجێک کە تەمەنی 19 ساڵە لە راپۆرتەکەدا قسەی کردووە و دەڵێت: “هەست ناکەم هیچ پەرۆشییەکم بۆ وڵاتەکەم هەیە، هیچ ئاماژەیەکی ژیانی سادە نابینم، دەچمە ئەوروپا بە یەکجاری و تەنیا بۆ سەردان دێمەوە بۆ تورکیا”.