پەرلەمانتارێكی كوردستان تووشی كۆرۆنا بوو

SNN- مەودا مستەفا

سەرۆكی فراكسیۆنی پارتی دیموكراتی كوردستان لە پەرلەمانی كوردستان رایگەیاند، جەلال پەرێشان تووشی ڤایرۆسی كۆرۆنا بووە.

ئەمرۆ دووشەممە ئومێد خۆشناو، سەرۆكی فراكسیۆنی پارتی دیموكراتی كوردستان بە SNNی راگەیاند: دوای تێکچوونی بارودۆخی تەندروستی جەلال پەرێشان پاش ئەنجامدانی پشكنین دەركەوت كە تووشی ڤایرۆسی كۆرۆنا بووە و ئێستا تەندروستی زۆرباشەو نەچۆتە نەخۆشخانەو لە ماڵەوە خۆی كەرەنتین كردووە.

راشیگەیاند “كەمپێك پێش ئێستا پەیوەندی بە خۆیەوە كرد دۆخی تەندروستیی مەترسیدار نییە، بەڵام كەمێك تای بەرزە و تەنگەنەفەسییەكی سووكی هەیە”.

جەلال محەمەد عەبدوڵڵا، ناسراو بە جەلال پەرێشان، ساڵی 1967 لە كەندێناوە لەدایكبووە، بەكالۆریۆسی لە پەروەردەی وەرزش و دیبلۆمی باڵای لە ژمێریاری تەواوكردووە ئەندامی پەرلەمنای كوردستان و ئەندامی لیژنەی رۆژنبیریشە لە پەرلەمانی كوردستان، و پێشتر ئەندامی ئەنجوومەنی پارێزگای هەولێر بووە لە هەڵبژاردنی ئەمجارەش یەكەم دەنگی لیستی پارتی بەدەست هێنابوو.