ڤیدیۆیەکی نوێی چەند ساتێک پێش مردنی جۆرج فلۆید بڵاوبۆوە

SNN-

رۆژنامەی دەیلی مەیل-ی بەریتانی ڤیدیۆیەکی نوێی ساتی دەستگیر کردنی جۆرج فلۆید ئەو رەشپێستە ئەمریکییە بڵاودەکاتەوە کە لەسەر دەستی چەند کارمەندێکی پۆلیسی شاری مینیاپۆلیس گیانی لەدەستدا.

رۆژنامەکە ڤیدیۆکەی لە کامێرای سەر سنگی ئەو ئەفسەر و کارمەندانەوە دەستکەوتووە کە بەشدار بوون لە خنکاندنی هاووڵاتییە رەشپێستەکەدا.

لە بەشێکی ڤیدیۆکەدا دەردەکەوێت کە فلۆید تکا لە پۆلیسێک دەکات تەقەی لێ نەکات و لێی دەپاڕێتەوە کە ئەو کارە نەکات و دەڵێت “بەیارمەتیت ئەفسەر مەمکووژە”.

لە بەشێکی دیکەی ڤیدیۆکەدا فلۆید هاوار دەکات کە ترسی لە شوێنە تەسکەکان هەیە و ناتوانێت بچێتە دواوەی ئۆتۆمبێلەکە و دەڵێت: “ناتوانم بە باشیی هەناسە بدەم”.

رۆژی 25ی ئایاری رابردوو لەشاری مینیاپۆلس، چوار پۆلیس پیاوێکی رەشپێستی تەمەن 46 ساڵ بە ناوی جۆرج فلۆید بە تۆمەتی ساختەکاری رادەگرن و کەلەپچەی دەکەن.

پیاوە رەشپێستەکە لە نێو ئۆتۆمبێلەکەی بووە و پۆلیس دەیهێنێتە خوارەوە، دواتر یەکێک لە پۆلیسەکان پیاوە رەشپێستەکە دەخاتە سەر زەوی و قاچێکی دەخاتە سەر ملی، هەرچەند پیاوە رەشپێستەکە دەڵێت ناتوانم هەناسە بدەم، پۆلیسەکە وازی لێناهێنێت، تاوەکو دەبوورێتەوە و دواتریش لە نەخۆشخانە گیانلەدەستدەدات.