ئامارەکانی تووشبوون بە کۆرۆنا لە ئیدارەی ڕاپەڕین رووی لە دابەزین کردووە

SNN- حەمەد مستەفا

لە سنووری ئیدارەی ڕاپەڕین ژمارەی تووشبووانی ڤایرۆسی کۆرۆنا رۆژ لە دوای رۆژ رووی لە کەمبوونەوە کردووە و بەرپرسی راگەیاندنی تەندروستی ڕاپەڕینیش دەڵێت:” بەراورد بە دوو هەفتەی رابردوو ئاماری تووشبووانی کۆرۆنا بە رێژەیەکی زۆر دابەزیووە”.

تەها محەمەد بەرپرسی راگەیاندنی تەندروستیی ڕاپەڕین بە SNNی راگەیاند: تا ئێستا لە سنووری ئیدارەی ڕاپەڕین 3134 پشکنینی کۆرۆنا ئەنجامدراوە و لەو ژمارەیەش 540 تووشبووی کۆرۆنا تۆمارکراوە کە بریتین لە 323 پیاو و 210 ئافرەت و 7 منداڵ .

وتیشی ” لەکۆی 540 تووشبووی ڤایرۆسەکە تاوەکو ئێستا 164 کەس چاکبوونەتەوە و لە بەرامبەریشدا 23 کەس لە ئیدارەی ڕاپەڕین بە کۆرۆنا گیانیانلە دەستداوە کە پێکدێن لە 13 پیاو و 10 ئافرەت ”

باسی لەوەشکرد : “لە ئێستادا 14 کەس لە سەنتەرەکانی کۆرۆنا لە رانیە و پشدەر لە ژێر چاودێری پزیشکیدان و باری تەندروستی زۆرینەشیان جێگیرە” .

تەها محەمەد راشیگەیاند : بەراورد بە دوو هەفتەی رابردوو ژمارەی توشبوانی کۆرۆنا لە ئیدارەی ڕاپەڕین بە رێژەیەکی بەرچاو دابەزیوە .