وێستگه‌یه‌كى كاره‌با كێشه‌ى گونده‌كانى نێوان گه‌رمیان و ئێران چاره‌سه‌ر ده‌كات
وێستگەی کارەبا
SNN- سیروان حه‌سه‌ن
به كڕین و دابینكردنى وێستگه‌یه‌كى كاره‌با بۆ ناحیه‌ى قۆره‌توو به بڕى یه‌ك ملیارو 200 ملیۆن دینار، كاره‌باى ناحیه و گونده‌كانى سنووره‌كه كه هاوسنوورن له‌گه‌ڵ ئێران، چاره‌سه‌ر ده‌كرێت و گرفتیش ڕوو بدات له‌مه‌ودوا راسته‌وخۆ ده‌دۆزرێته‌وه.
حازم كه‌ریم بەڕێوه‌به‌رى گشتى كاره‌باى گه‌رمیان بهSNNى راگه‌یاند: دواى ئه‌وه‌ى له مانگى یه‌كى ساڵى 2020 گرێبه‌ستیان كرد بۆ كڕینى وێستگه‌یه‌كى كاره‌با بۆ سنوورى قۆره‌توو له سنوورى گه‌رمیان، له ئێستادا وێستگه‌كه گه‌یشتووه به ده‌ستیان.
وتیشى: “ئه‌و وێستگه‌یه به یه‌ك ملیار و 200 ملیۆن دینار كڕدراوە لەسەر بوودجەی ئاسایی بەڕێوەبەرایەتییەکەیان و بڕى 25 مێگاوات كاره‌با دابینده‌كات بۆ سنوورى ناحیه‌ى قۆره‌توو و گونده‌كانى ده‌ورووبه‌رى كه هاوسنوورن لەگه‌ڵ ئێران و كێشه‌ى ئه‌و ناوچانه لە رووی کارەباوە چاره‌سه‌ر ده‌كات”.
حازم كه‌ریم راشیگه‌یاند: پێشتر یه‌ك خه‌تى 11 و 33 كه‌ى ڤى هه‌بوو ئه‌گه‌ر گرفت دروستبووایه كاتێكى زۆرى ده‌ویست تاوه‌كو بیدۆزنه‌وه، به‌ڵام ئه‌م وێستگه‌یه ناوچه‌كه دابه‌شده‌كات بۆ پێنج به‌ش له‌كاتێكدا گرفت له یه‌كێك له‌و به‌شانه دروستببێت، ئه‌وا به‌شه‌كانى تر كێشه‌یان نابێت و هاوكات هه‌ر زوو ده‌توانن کێشەکەش بدۆزنه‌وه.
