هێزەکانی پاسدارانی ئێران شوانێکی خەڵکی پشدەر بریندار دەکەن

SNN – محەمەد مستەفا

ئێوارەی ئەمڕۆ، لەسەر سنووری نێوان باشوور و ڕۆژهەڵاتی کوردستان لە لایەن هێزەکانی پاسدارانی ئێرانەوە تەقە لە شوانێکی دانیشتووی قەزای پشدەر كراوه‌ و بریندار بووه‌.

شۆڕش ئیسماعیل، وتەبێژی پۆلیسی ڕاپەڕین بە SNNی راگەیاند: “ئێوارەی ئەمڕۆ شوانێکی گەنجی تەمەن 30 ساڵی دانیشتووی ناحیەی ژاراوەی قەزای پشدەر بە برینداری گەیەنراوەتە نەخۆشخانەی گشتی قەڵادزێ کە گوللەیەک بەر روومەتی کەوتبوو”.

وتیشی: “بە وتەی کەسوکارەکەی ئەو شوانە لەسەر سنوور سەرقاڵی لەوەڕاندنی ئاژەڵەکانی بووە و لە لایەن هێزەکانی پاسدارانى ئێرانەوە تەقەی لێکراوە و گوللـەیەک بەر روومەتی کەوتووە”.

وتەبێژی پۆلیسی ڕاپەڕین باسی لەوەشکرد: “پاش ئەنجامدانی فریاگوزاری سەرەتایی ئەو شوانە بریندارە رەوانەی نەخۆشخانەی فریاکەوتنی سلێمانی کراوە و لێکۆڵینەوە لە رووداوەکە دەستیپێکردووە”.