شهش كهس له ئاودا خنكاون دواههمینیشیان تهرمهكهى نهدۆزراوهتهوه
SNN- سیروان حهسهن
له سنوورى گهرمیان ئهمساڵ تاوهكو ئێستا شهش كهس له ئاودا خنكاون كه زۆربهیان گهنج بوون، دواههمینشیان گهنجێكى تهمهن 20 ساڵانه و ماوهى سێ رۆژه تهرمهكهى نهدۆزاوهتهوه و ئهمڕۆ فرۆكهیان هێناوه بۆ ئهوهى به دوایدا بگهڕێت.
ئیبراهیم محهمهد بهرێوهبهرى بهرگرى شارستانى كهلار به SNNى راگهیاند: بهپێى ئامارهكان تهنها له ماوهى ئهمساڵدا له سنوورى گهرمیان له رووبارو گۆم و چهمهكاندا شهش هاووڵاتى خنكاون كه دواههمینیان گهنجێكى دانیشتووى شارى كهلاره ماوهى سێ رۆژه له رووبارى سیروان خنكاوه و نهدۆزراوهتهوه.
وتیشى “ههرچهنده گرفتى تیم و ئامێریان نییه، بهڵام له زۆربهى ئهو حاڵهتانه تووشى گرفتى درهنگ دۆزینهوهى تهرمهكان دهبن به تایبهتى له رووبارى سیروان ئهمهش بههۆى زۆرى ئاوهكه و بهردهوام رۆیشتنیهتى ههروهها ساردى ئاوهكهش وا دهكات دواى چوار ڕۆژ تهرمهكه بێته سهرهوه”.
زۆربهى ئهوانهى له ئاودا خنكاون گهنجن و هۆكارهكهشى گهشت و سهیران و مهلهكردن بووه. ئهو گهنجهى ماوهى سێ رۆژه خنكاوه له ناوچهى قولهسوتاو له نزیك شارى كهلار ناوى “محهمهد جهلال”ه و تهمهنى 20 ساڵه، ئهمڕۆ هێلیكۆپتهر له سلێمانییهوه ڕهوانهى ناوچهكه كراوه بۆ ئهوهى تهرمهكهى بدۆزنهوه، بهڵام هێشتا نهدۆزراوهتهوه.
