لە ترسی رووداوەکەی بەیروت، فڕۆکەخانەی بەغدا چەند ماددەیەکی مەترسیدار لەخۆی دوور دەخاتەوە

SNN-

بەرپرسانی باڵای عێراق رایدەگەیەنن “چەند ماددەیەکی مەترسیداریان لە فڕۆکەخانەی بەغدا دوورخستۆتەوە کە سووتێنەرن و بەئاسانیی گڕ دەگرن، وەک خۆپارێزییەک تا تووشی هەمان رووداوی لوبنان نەبن”.

دەستەی دەروازە سنوورییەکان لە بەیاننامەیەکدا بڵاویکردۆتەوە “کە لە پڕۆسەیەکی خێرا و کورت مەودادا توانیویانە چەند کەرەستەیەکی مەترسیداری سووتێنەر لەناو کارگۆی فڕۆکەخانەی بەغداوە بگوازنەوە بۆ چەند کۆگایەکی سەربازیی و لەناو بارەگای ئەندازیاری سەربازیی سوپادا عەمبار کراوە”.

بەیاننامەکە دەڵێت: “مستەفا کازمی سەرۆکوەزیرانی عێراق فەرمانیداوە کە هەر ماددەیەکی تووند و سووتێنەر و نیتراتی ئەمۆنیا پێویستە لە شوێنی نیشتەجێبوون دووربخرێتەوە”.

بەگوێرەی فەرمانەکە هەموو دەروازە ئاویی و وشکانی و ئاسمانییەکان دەبێت پابەند بن بەو بڕیارەوە و لە زووترین کاتدا لایەنی پەیوەندیدار دەبێت بەکاری پێویست هەستێت.

رۆژی سێشەممە 4ی ئەم مانگە، تەقینەوەیەک لە بەندەری بەیروت روویدا و بەهۆیەوە تاوەکو ئێستا 158 کەس گیانیان لەدەستداوە و زیاتر لە 5 هەزار کەسیش برینداربوون.