ئێران دوو هاووڵاتی خۆی بەتۆمەتی سیخوڕیی سزا دا
SNN
دەسەڵاتدارانی ئێران دوو هاووڵاتییان بە 10 ساڵ زیندانیکردن بۆ هەر یەکێکیان سزا دا کە هەردووکیان تۆمەتی ئەوەیان خراوەتە پاڵ کاری سیخوڕییان بۆ وڵاتێکی بێگانە کردووە.
غولام حسێن ئیسماعیلی وتەبێژی دەسەڵاتی دادوەریی ئێران رایگەیاند “ئەو دوو تۆمەتبارە یەکێکیان سیخوڕیی بۆ ئیسرائیل و ئەڵمانیا کردووە، ئەویتریان بۆ بەرژەوەندی بەریتانیا کاری کردووە”.
ئیسماعیلی وتیشی: “تۆمەتبارێکیان ناوی (مەسعود مساحب)ە و سەرۆکی کۆمەڵەی دۆستایەتی ئێرانی – نەمساوییە و کاری بۆ بەرژەوەندیی ئیسرائیل و ئەڵمانیا کردووە”.
وتیشی: “مەسعود زانیاریی ئاشکرا کردووە لەسەر بەرنامەی ئەتۆمیی ئێران و ئەوەی زانیوێتی لەوبارەیەوە بە حکومەتی ئیسرائیلی گەیاندووە”.
ئەوەشی ئاشکرا کرد “تۆمەتباری دووەم ناوی شەهرام شیرخانییە و زانیاریی لەسەر دامەزراوە زانستی و بانکییەکان کۆکردۆتەوە و هەوڵی داوە نهێنییەکانی وەزارەتی بەرگری بگوازێتەوە بۆ بەریتانیا”.
