ئەردۆغان: تەنیا بە دانوستان رەوشی دەریای ناوەڕاست چارەسەردەکرێت

SNN

سەرۆککۆماری تورکیا ئەمڕۆ رایگەیاند، تەنیا بە گفتوگۆ و دانوستان رەوشی دەریای ناوەڕاست چارەسەردەکرێت، وتیشی: “تورکیا بەدوای سەرکەشیدا ناگەڕێت”.

سەبارەت بە دوایین پێشهاتەکانی رۆژهەڵاتی دەریای ناوەڕاست، ڕەجەب تەییب ئەردۆغان ئەمڕۆ پێنجشەممە، لە میانی وتارێکیدا لەبەردەم ئەندامانی پارتی ئاکەپە رایگەیاند: “تا 23ی ئاب، تورکیا لە دەرهێنانی نەوت و گاز لە دەریای ناوەڕاست بەردەوامدەبێت”، لەگەڵ ئەوەشدا یۆنانی بە هۆکاری زیادبوونی گرژییەکانی ناوچەکە ناوبرد و وتی: “پێویستە ئەسینا رێز لە مافەکانی تورکیا بگرێت”.

ئەردۆغان لە درێژەی قسەکانیدا وتی: “تاکە رێگا بۆ چارەسەرکردنی کێشەکانی دەریای ناوەڕاست لەرێگەی گفتوگۆ و دانوستانەوەیە، تورکیا شوێنی هیچ سەرکەشی و گرژییەکی ناپێویست نەکەوتووە”.

لەلایەکی دیکەوە ئەمڕۆ وەزارەتی بەرگری فەرەنسا رایگەیاند: فەرەنسا هەردوو كەشتی فڕۆكەهەڵگری لاڤیت و ڕاڤاڵی رەوانەی ئاوەكانی دەریایی ناوەڕاست كردووە، لە شەوی رابردووشەوە مەشق و راهێنانی هاوبەشی فەرەنسا و یۆنان لە ئاوەکانی دەریای ناوەڕاست دەستیپێکردووە”.

لەوبارەیەشەوە کیریاکۆس میتسۆتاکیس سەرۆکوەزیرانی یۆنان بە گەرمی سوپاسی پشتیوانییەکانی فەرەنسایکرد.